काठमाडाैं । प्रधानमन्त्री पुष्पकमल दाहाल प्रचण्डले नागरिकता विधेयक एक महिनाभित्र टुंगिने बताउनुभएकाे छ ।
बिहीबार बसेकाे प्रतिनिधि सभा बैठकमा जनता समाजवादी पार्टीका सांसद् दीपक कार्कीले सोधेको प्रश्नको जवाफ दिँदै प्रधानमन्त्री प्रचण्डले भन्नुभयाे - 'एक महिनामै यसकाे टुंगाे लाग्छ ।'
उहाँले दोस्रो पटक दुवै सदनबाट पारित भएर गएको नागरिकता विधेयक अहिले राष्ट्रपति कार्यालयमा रहेको र उक्त विधेयक राष्ट्रपति रामचन्द्र पौडेलले अध्ययन गरिरहनुभएकाे बताउनुभयाे । प्रधानमन्त्री प्रचण्डले भन्नुभयाे - 'राष्ट्रपति कार्यालयले त्यसलाई हाेल्डमा राखेकाे छ, त्यसको पोजिसन के हुने ? साे विधेयकलाई प्रमाणीकरण गर्ने वा अर्काे कुनै बाटो भन्नेबारे संविधानविद्, कानुनविद् र राजनीतिज्ञसँग छलफल चलिरहेको छ, बार एशाेसियशन लगायत संविधान र कानुनका विज्ञसँग हामीले बालुवाटारमा छलफल गरेका थियौं, पूर्व तथा वर्तमान महान्यायाधिवक्ता र विज्ञले सर्वसम्मत रुपमा राष्ट्रपतिले त्यही विधेयक प्रमाणीकरण गर्न सक्ने सुझाव दिनुभएको छ ।'
त्यस छलफलबारे राष्ट्रपति पाैडेललाई आफूले जानकारी गराएकाे र राष्ट्रपतिले पनि आफूले संविधानविद् र कानुनविद्काे राय लिएर टुंगाे पुग्ने बताउनुभएकाे उहाँ ले सुनाउनुभयाे । 'सायद उहाँ अहिले पनि अध्ययनकै क्रममा हुनुहुन्छ'- प्रधानमन्त्री प्रचण्डले भन्नुभयाे ।
पुरानै विधेयक राष्ट्रपतिबाट प्रमाणीकरण गराउने वा नयाँ ल्याउने भन्ने विषयमा छलफल भइरहेकाे उहाँले बताउनुभयाे । सदनबाट संकल्प प्रस्ताव वा अरु प्रस्तावमार्फत पुरानै विधेयक प्रमाणीकरण गर्न राष्ट्रपतिलाई अनुरोध गर्ने, मन्त्रिपरिषद्बाटै निर्णय गरेर राष्ट्रपतिलाई आग्रह गर्ने वा नयाँ विधेयक ल्याएर अघि बढ्ने विकल्पहरू रहेको र यसमा सरकारले अध्ययन गरिरहेकाे प्रधानमन्त्री प्रचण्डले बताउनुभयाे । प्रधानमन्त्रीकाे हैसियतले एक महिनामा यसलाई टुंगाेमा पुर्याउन पहल गर्ने पनि उहाँले बताउनुभयाे ।
