काठमाडाैं । कानुन न्याय तथा संसदीय मामिलामन्त्री धनराज गुरुङले शान्ति प्रक्रियालाई निष्कर्षमा पुर्याउजका लागि सबैले योगदान गर्नुपर्ने बताउनुभएको छ ।
बिहीबार सिंहदरबारमा बसेको प्रतिनिधि सभाको कानुन, न्याय तथा मानवअधिकार समितिकाे बैठकमा मन्त्री गुरुङले १७ वर्षदेखि बाँकी रहेका शान्ति प्रक्रियाका कामलाई निष्कर्षमा पुर्याउनका लागि सरकार र दल विशेष मात्रै नभई सबैले योगदान गर्नुपर्ने बताउनुभयाे ।
शान्ति प्रक्रियाको विषय सवै दलको साझा विषय भएकाले सबैसँगको समझदारीमा नै यसलाई निष्कर्षमा पुर्याइने उहाँले बताउनुभयो । सत्य निरुपण तथा मेलमिलाप आयोग सम्बन्धी संशोधन विधेयकको मस्यौदाबारे जानकारी दिँदै मन्त्री गुरुङले छानबिन प्रतिवेदनका आधारमा पीडितलाई न्याय दिने बताउनुभयो ।
उहाँले संक्रमणकालीन न्यायसम्बन्धी विषयमा प्राप्त हुने सुझावले यस विधेयकलाई थप समृद्ध बनाउने विश्वास व्यक्त गर्नुभयो । विधेयकमाथि समितिको अर्को बैठकबाट छलफल सुरु हुने बताइएको छ ।
बैठकले समितिको कार्यविधिलाई पारित गरेको छ ।
