काठमाडाैं । प्रमुख प्रतिपक्षी नेकपा एमालेका सांसद् रामचन्द्र राईले मुलुककाे नेतृत्वहरुकाे भनाई र गराईमा एकरुपता हुनुपर्ने बताउनुभएकाे छ ।
शुक्रबार बसेकाे राष्ट्रिय सभा बैठककाे विशेष समयमा बाेल्दै सांसद् राईले तत्कालीन माओवादी लडाकु शिविर (क्यान्टोनमेन्ट) मा भएको भ्रष्टाचारबारे प्रधानमन्त्री पुष्पकमल दाहाल प्रचण्डले प्रतिनिधि सभामा दिएकाे जवाफप्रति आपत्ति जनाउनुभयाे ।
क्यान्टोनमेन्टकाे भ्रष्टाचारबारे प्रतिनिधि सभामा सोधिएको प्रश्नको सही जवाफ प्रधानमन्त्रीले नदिएको भन्दै उहाँले महालेखा परीक्षकको कार्यालयले ठिक छ भनेको विषयलाई प्रश्न उठाउन उपयुक्त हुँदैन भनेर प्रधानमन्त्री पन्छिन खाेज्जुभएकाे बताउनुभयाे ।
सबैकाे चाहाना सुशासन भएकाे भन्दै सांसद् राईले सुशासन कायम गर्न सके मात्र नेपाली जनतामा आशा पलाउने बताउनुभयाे । जनतामा आशा पलाउन मुलुकको नेतृत्व गरिरहेको मान्छेको भनाई र गराईमा एकरुपता हुन आवश्यक रहेकाे सांसद् राईले बताउनुभयाे ।
उहाँले भन्नुभयाे - 'मैले हिजो प्रतिनिधि सभाको पश्नोत्तर कार्यक्रम टिभीमा हेर्दै थिएँ, त्यहाँ एक जना माननीयज्यूले क्यान्टोनमेन्टको भ्रष्टाचारबारे कुरा उठाउनुभयो, त्यति मात्रै हाेइन उहाँले हाम्रा प्रधानमन्त्रीले हाम्रा सेना ७-८ हजार त हो नि, हामीले १९, २०, २२ हजार गरेर कम्तिमा १९ हजार त प्रमाणीकरण गर्न भ्यायाैं भन्नुभएकाे थियाे याे के हाे भनेर साेध्नुभएकाे थियाे, तर प्रधानमन्त्रीले हिसाब ठिकै छ, महालेखा परीक्षकको कार्यालयले ठिक भनिसकेकाले धेरै नकोटयाऔं भनेर जवाफ दिनुभयाे, साेधाइ के थियाे भने तपाईंले त्यो बेला भिडिओ टेपमा ६-७ हजार मात्रै भन्नुभएको थियो नि त्यो के हो भनेर सोधिएको थियो, यसले के देखाउँछ भने मुलुकको नेतृत्व गरिरहेको मान्छेले अभिव्यक्त गर्ने भनाई, गराई र व्यवहारमा एकरुपता भएन भने सुशासन कायम हुन सक्दैन ।'
मुलुककाे नेतृत्व गर्नेहरुकाे भनाइ र गराइमा एकरुपता आओस् भन्ने कामना पनि उहाँले गर्नुभयाे । 'कहिँकतै गल्ती भए त्यसमा क्षमा माग्दै अगाडि बढ्ने काममा थालनी होस्, म अपेक्षा गर्छु'- सांसद् राईले भन्नुभयाे ।
नेपाली जनताले सुशासन र समृद्धि चाहेकाले सरकारले सोही अनुसार काम गर्न उहाँले सरकारकाे ध्यानाकर्षण गराउनुभयाे । राष्ट्रिय गाैरवका आयाेजनाहरुलाई प्राथमिकता दिएर काम गर्न पनि सांसद् राईले सरकारकाे ध्यानाकर्षण गराउनुभयाे । आयाेजनाहरु बन्दैनन् भनेर जनतामा निराश पैदा गर्ने काम भएकाे भन्दै उहाँले सुरुङ र रेल आयाेजनाकाे काम सकेर जनतामा विश्वास जगाउने आयाेजना पूरा गर्न सरकारसँग माग गर्नुभयाे ।
