काठमाडाैं । सरकारले राष्ट्रिय पूँजी पलायनलाई कडाइसाथ नियन्त्रण गर्ने भएकाे छ ।
शुक्रबार संघीय संसद्काे संयुक्त बैठकमा आगामी आर्थिक वर्ष २०८०-८१ को नीति तथा कार्यक्रम प्रस्तुत गर्दै राष्ट्रपति रामचन्द्र पाैडेलले भन्नुभयाे - 'राष्ट्रिय पुँजी पलायनलाई कडाइसाथ नियन्त्रण गरिनेछ ।'
हुण्डी लगायत अवैध कारोबारलाई कडाइसाथ नियन्त्रण गरिने पनि उहाँले बताउनुभयाे । राष्ट्रपति पौडेलले राजस्व प्रशासनलाई थप सुदृढ र चुस्त बनाइने बताउनुभयाे । विद्यमान कर प्रणालीमा पुनरावलोकन गरिने, राजस्वको दायरा विस्तार गर्ने र सबै प्रकारका आर्थिक क्रियाकलापलाई औपचारिक प्रणालीमा आवद्ध गर्ने घाेषणा पनि उहाँले गर्नुभयाे ।
पुँजीगत खर्च वृद्धि गरिने र सरकारी खर्चमा मितव्ययिता अपनाइने राष्ट्रपति पाैडेलले बताउनुभयाे । सार्वजनिक खरिद कानुनमा सममायिक सुधार गरिने र वित्तीय संघीयताकाे प्रभावकारी कार्यान्वयन गरिने पनि उहाँले बताउनुभयाे ।
