काठमाडौं । प्रतिनिधि सभामा विपक्षी दलका नेता केपी शर्मा ओलीले आर्थिक वर्ष २०८०/०८१ को १५ औँ पञ्चवर्षीय योजनाको अन्तिम वर्ष भएकोले यस अवधिमा कति काम भयो र अब के के काम गर्ने भन्ने कुरा सरकारको नीति तथा कार्यक्रममा नरहेको बताउनुभएकाे छ ।
आइतबार प्रतिनिधि सभा बैठकमा सरकारको नीति तथा कार्यक्रम माथिको छलफलमा भाग लिँदै ओलीले आर्थिक वर्ष २०८०/०८१ को १५ औँ पञ्चवर्षीय योजनाको अन्तिम वर्ष भएकोले यस अवधिमा कति काम भयो र अब के के काम गर्ने भन्ने कुरा सरकारको नीति तथा कार्यक्रममा नरहेको बताउनुभयो । प्रस्तावित नीति तथा कार्यक्रम देशमा नै पहिलो पटक बनाए जसरी आएको भन्दै उहाँले आलोचना गर्नुभयो । ‘शून्यबाट सुरु गरिएको भान दिन खोजिँदै छ, राज्य अविच्छिन्न हुन्छ, राज्यको आधारभूत मान्यतालाई नीति र कार्यक्रमले स्वीकार गर्न सकेको छैन’, ओलीले भन्नुभयो ।
देश असामान्य अवस्थाबाट गुज्रिएको ओलीले बताउनुभयो । सरकार प्रति जनताको विश्वास ह्रास भएको, अर्थतन्त्र संकटासन्न अवस्थामा रहेको, सरकार राजश्व उठाउन समर्थ अवस्थामा रहेको ओलीले बताउनुभयो । राजश्वले कर्मचारीको तलब र पेन्सनसम्म धान्न नसक्ने अवस्थामा देश पुगेको ओलीले बताउनुभयो ।
देश सङ्कटमा पर्दा पनि सरकारले त्यसलाई लुकाउने काम गरेको उहाँले बताउनुभयो । सरकार बेखर जस्तो भएर आत्मरतिमा रमाएको ओलीले टिप्पणी गर्नुभयो । सरकारले जनतालाई अलमल्याउने प्रयास गरेको उहाँको भनाइ छ । सरकारको नीति तथा कार्यक्रमले देशमा ऊर्जा थप्न नसकेको उहाँले प्रष्ट पार्नुभयो । सरकारको नीति तथा कार्यक्रममा कुनै उत्साह नभएको उहाँले बताउनुभयो । ‘संक्षिप्तमा भन्दा नीति तथा कार्यक्रमको उद्देश्य नै छैन, सर्वत्र नीत, शून्य नीतिको अवस्था छ’, ओलीले भन्नुभयो ।
