काठमाडाैं । प्रमुख प्रतिपक्षी नेकपा एमालेका अध्यक्ष एवं संसदीय दलका नेता केपी शर्मा ओलीले प्रस्तावित नीति तथा कार्यक्रम फिर्ता लिन सरकारलाई आग्रह गर्नुभएकाे छ ।
आइतबार बसेकाे प्रतिनिधि सभा बैठकमा सरकारकाे नीति तथा कार्यक्रममाथिकाे छलफलमा बाेल्दै अध्यक्ष ओलीले नीति तथा कार्यक्रमकाे कुनै उद्देश्य, मिसन र गन्तव्य नभएकाे बताउनुभयाे ।
प्रस्तावित नीति तथा कार्यक्रमले देश र जनताबारे केही नबोलेको, देशकाे समस्या समाधानका लागि केही मिसन नभएकाे भन्दै उहाँले फिर्ता लिएर पुर्नलेखन गर्न सरकारलाई आग्रह गर्नुभयाे । अध्यक्ष ओलीले भन्नुभयाे - ' प्रस्तावित नीति तथा कार्यक्रम फिर्ता लिनुस्, पुर्नलेखन गर्नुस्, यसलाई पुर्नलेखन गर्ने छुट दिन हामी तयार छाैं ।'
उहाँले देशका लागि, समाज र अर्थतन्त्रलाई अगाडि बढाउने हिसाबले नीति तथा कार्यक्रम परिमार्जन गर्न पनि प्रधानमन्त्री पुष्पकमल दाहाल प्रचण्डलाई आग्रह गर्नुभयाे ।
ओलीले सरकारको नीति तथा कार्यक्रम देश र जनताको लागि हुनुपर्ने बताउनुभयो । सरकारले ल्याएको नीति तथा कार्यक्रममा शून्य नीति र कार्यक्रममा भएकोले त्यसलाई फिर्ता लिएर पुनर्लेखन गर्न प्रधानमन्त्रीलाई आग्रह गर्नुभयो । सरकारको नीति तथा कार्यक्रमले देशको आवश्यकता सम्बोधन गर्न नसकेको ओलीले प्रष्ट पार्नुभयो । ‘सरकार यसमा चुकेको छ’, उहाँले भन्नुभयो ।
सरकारसँग देशको समस्या समाधान गर्ने इच्छाशक्ति नभएको कुरा नीति तथा कार्यक्रमले पुष्टि पारेको ओलीले बताउनुभयो । नीति तथा कार्यक्रममा कुनै मिसन नभएको, राष्ट्रिय गौरवका आयोजना सम्पन्न गर्ने कुनै प्रष्ट योजना सरकारसँग नभएको उहाँले बताउनुभयो । आयोजना छनोटमा समेत पूर्वाग्रह रहेको ओलीले बताउनुभयो ।
नेकपा एमालेले अघि बढाएका राष्ट्रिय महत्त्वका आयोजनाहरू अहिले अलपत्र भएका ओलीले बताउनुभयो । ती सबै कार्यक्रम वर्तमान सरकारको नीति तथा कार्यक्रममा हराएको भन्दै उहाँले आलोचना गर्नुभयो । सरकारले विकास आयोजनामा समेत एमालेसँग पूर्वाग्रह राखेको ओलीले बताउनुभयो ।
सरकारले दुई वर्षमा आफूलाई गाली गर्ने, एमालेलाई गाली गर्ने, खेल खेल्ने र गोटी सार्ने बाहेक कुनै काम नगरेको उहाँले बताउनुभयो ।
