काठमाडौं । एकीकृत समाजवादी अध्यक्ष माधवकुमार नेपालले कुन प्रधानमन्त्रीले के-कस्ताे काम गरे भन्नेबारे सदनमा छलफल हुनुपर्ने बताउनुभएकाे छ ।
साेमबार बसेकाे प्रतिनिधि सभा बैठकमा नीति तथा कार्यक्रममाथिकाे छलफलमा भाग लिँदै पूर्व प्रधानमन्त्री समेत रहनुभएका अध्यक्ष नेपालले आफू त्यसका लागि तयार रहेकाे बताउनुभयाे ।
'पुराना प्रधानमन्त्रीले पनि राम्रै काम गर्नुभएकाे हाेला, एकचाेटी राम्राे के हुन्थ्याे भने संसद्मै प्रधानमन्त्रीकाे प्रतिष्पर्धा गराउनुछ भने आफ्नाे-आफ्नाे कार्यकालयमा कस-कसले के गरे ? सब ल्याएर संसद् मूल्यांकन गरिदिएपनि हुन्छ, म त तयार छु'- उहाँले भन्नुभयाे । आफूले गरेका कामकाे वास्ता नभएकाे भन्दै अध्यक्ष नेपालले मनमा पीडा भइरहेकाे बताउनुभयाे ।
यथार्थवादी भएर चल्नुपर्ने भन्दै उहाँले हावादारी याेजना नल्याउन सरकारलाई सुझाव दिनुभयाे । अध्यक्ष नेपालले तत्कालीन एमाले सरकारका पालामा घरघरमा पाइपमा ग्यास पानीजहाज जस्ता हावादारी याेजना ल्याइएकाे आराेप लगाउनुभयाे ।
सबैकाे ज्ञान र बुद्धि संगाल्ने हाे भने देश बनाउन सकिने भन्दै उहाँले एकले अर्काेलाई घाेचेपेच गरेर नहुने बताउनुभयाे । एमाले अध्यक्ष केपी शर्मा ओलीतर्फ लक्षित गर्दै नेपालले भन्नुभयाे - 'एकले अर्कालाई घोचेर मात्र हुँदैन, पीडा-व्यथा पोखेर मात्र हुँदैन, सरकारमा बस्न सकिएन, त्यो बेग्लै कुरा हो, किन बस्न सकिएन त्यसकाे पछाडि पनि अरूलाई दोष दिएर हुँदैन, बनिसकेको सरकार किन आफ्नो हातबाट फुस्कियो ? त्यसकाे निम्ति पनि अरूलाई सत्तोसराप गरेर हुँदैन ।'
आफूभित्रका कमीकमजाेरीलाई पहिचान गरेर सुधार गरेर अगाडि बढ्नुपर्ने उहाँले बताउनुभयाे । नेपालमा सबैभन्दा ठूलाे समस्या व्यक्तिवाद रहेकाे बताउँदै अध्यक्ष नेपालले भन्नुभयाे - 'सबैभन्दा ठूलो समस्या व्यक्तिवादको रोग हो, दाेस्राे भनेकाे आफूलाई सर्वज्ञानी ठान्ने प्रवृत्ति हो, तेस्राे अरुलाई अवमूल्यन गर्ने प्रवृति हो, सबैको साथ लिनेभन्दा पनि आफ्नै पाराले चल्ने प्रवृति पनि हो, यसबाट मुक्त हुन सकिएन भने, अगाडि बढ्न सकिँदैन ।'
इमान्दारीता भयाे भने सबै समस्या समाधान हुने उहाँले बताउनुभयाे । प्रधानमन्त्री पुष्पकमल दाहाल प्रचण्डलाई इमान्दार भएर अगाडि बढ्न र भ्रष्टाचारकाे जालाे ताेड्न अध्यक्ष नेपालले सुझाव दिनुभयाे ।
केपी ओलीप्रति व्यंग्य गर्दै उहाँले एकैपटक अस्पताल बाटाघाटाकाे शिलान्याय नगर्न समेत प्रधानमन्त्रीलाई सुझाउनुभयाे । जनतालाई केन्द्रबिन्दुमा बसेर काम गर्न सकिए देशलाई सफल बनाउन सकिने अध्यक्ष नेपालले बताउनुभयाे ।
समानता र न्यायपूर्ण समाज निर्माणका लागि अगाडि बढ्दै सुखी नेपाली समृद्ध नेपालकाे मान्यतालाई लागू गर्न सकियाे भने मात्र नेपाली नमुनाकाे समाजवादकाे खाका तयार गर्न सकिने बताउनुभयाे । समाजवादकाे यात्राबाट भड्किने काम हुन नहुनेकाे उहाँकाे भनाइ छ ।
