काठमाडाैं । प्रधानमन्त्री पुष्पकमल दाहाल प्रचण्डले सरकारकाे नीति तथा कार्यक्रमकाे विराेध गर्नुपर्ने कुनै कारण भएकाे दाबी गर्नुभएकाे छ ।
मंगलबार बसेकाे राष्ट्रिय सभा बैठकमा सरकारकाे नीति तथा कार्यक्रममाथिकाे छलफलमा उठेका प्रश्नकाे जवाफ दिँदै प्रधानमन्त्री प्रचण्डले अहिलेको नीति तथा कार्यक्रम राष्ट्रिय सहमतिको भएकाले यसकाे विरोध गर्नुपर्ने कुनै कारण नभएको दाबी गर्नुभयाे ।
'नीति तथा कार्यक्रम राष्ट्रिय सहमतिकाे दस्तावेज हाे, म प्रधानमन्त्री हुँदादेखि अहिलेसम्मकाे यसाे विचार गर्नुभयाे भने बढाे माैलिक चित्र आउँछ र नेतृत्वकाे निरन्तरता, दुबै गठबन्धनमा एउटै नेतृत्व छ, अघिल्लो पटक सत्तापक्ष र प्रतिपक्ष दुबैले समर्थन गरेको प्रधानमन्त्री हूँ, यस्तो प्रधानमन्त्री सितिमिति भेटिँदैन'- उहाँले भन्नुभयाे ।
राष्ट्रिय हितको रक्षा गर्दै समृद्ध, सबल र न्यायपूर्ण नेपाल निर्माण गर्ने सर्वोपरी लक्ष्य हासिल गर्ने दृढ संकल्पका साथ नीति तथा कार्यक्रम प्रस्तुत गरिएको उहाँले बताउनुभयो । नीति तथा कार्यक्रमले देशका विद्यमान चुनौतीको समाधान गर्दै सुशासन, सामाजिक न्याय र समृद्धिको राष्ट्रिय आकांक्षा हासिल गर्ने उद्देश्य लिएको लिएकाे प्रधानमन्त्री प्रचण्डले बताउनुभयाे ।
नीति तथा कार्यक्रममा आर्थिक, सामाजिक रूपान्तरणका नवीन सोच र कार्यक्रमहरू राखिएकाे विगतका राम्रा कार्यक्रमलाई निरन्तरता दिइएकाे उहाँले बताउनुभयाे । नीति तथा कार्यक्रमले नयाँ र पुराना कार्यक्रमकाे सन्तुलन मिलाएकाे दाबी पनि प्रचण्डले गर्नुभयाे ।
प्रधानमन्त्री प्रचण्डले देशको अर्थतन्त्र श्रीलंकको जस्तो हुने कुरा साँचो नभएको भन्दै अर्थतन्त्रबारे आतंकित पार्ने झुटो कुरा कसैले गर्न नहुने बताउनुभयाे । उहाँले अर्थतन्त्रका सूचकहरु सकारात्मक दिशातर्फ अघि बढ्ने संकेत प्राप्त भएकाले सरकारको कार्यक्रम र बजेट अर्थतन्त्रलाई लयमा ल्याउनेमा केन्द्रि गरिने बताउनुभयो ।
आयात व्यवस्थापन र निर्यात प्रवर्द्धन, विकास निर्माण कार्यको निर्धारित लागत र समयमा सम्पादन, शासकीय सुधार तथा भ्रष्टाचार नियन्त्रण एवं सामाजिक न्याय र शान्ति सुरक्षा कायम गर्ने विषयलाई विशेष जोड दिएर नीति तथा कार्यक्रम तयार पारिएको उहाँले बताउनुभयो ।
आफ्नो निकट भविष्यमा हुने भारत भ्रमणका क्रममा समकक्षीसँग भेट हुने र राष्ट्रिय हितका साथै नेपाल भारत सम्बन्धका समस्याबारे पनि प्रष्ट ढंगले कुरा गर्ने बताउनुभयो । भ्रमणका क्रममा मल कारखाना स्थापना गर्ने विषयमा पनि कुराकानी हुने पनि उहाँले बताउनुभयाे ।
