काठमाडौं । नेपाली कांग्रेसका सांसद् विमलेन्द्र निधिले राष्ट्रपति कार्यालयमा हाेल्ड रहेकाे नागरिकता विधेयक राष्ट्रपति रामचन्द्र पौडेलले तत्काल प्रमाणीकरण गर्नुपर्ने बताउनुभएकाे छ ।
बुधबार बसेकाे प्रतिनिधि सभा बैठकको शुन्य समयमा बोल्दै सांसद् निधिले साे विधेयक प्रमाणीकरणका लागि राष्ट्रपति पौडेललाई सहयाेग गर्न सरकारसँग माग गर्नुभयाे ।
नागरिकता विधेयक प्रमाणीकरण गर्ने विषयमा राष्ट्रपति पाैडेलले प्रधानमन्त्री पुष्पकमल दाहाल प्रचण्ड, मन्त्रीहरु, काननुनविद् लगायतसँग छलफल गर्नुभएकाे र कानुनी तथा संवैधानिक आधार खाेजिरहनुभएकाे सुनिएकाे भन्दै उहाँले साे विधेयक प्रमाणीकरण गर्न संविधान र कानुनी रुपमा कुनै बाधा अडचन नभएकाे बताउनुभयाे ।
'सभामुखमार्फत सरकारको के ध्यानाकर्षण गराउन चाहन्छु भने र यो संसद्मा प्रतिपक्षका सांसद्हरुले पनि बोल्नु भएको छ, राष्ट्रपतिको सल्लाहकार भनेको प्रधानमन्त्री र मन्त्रिपरिषद् नै हुन्छ, अब त्यो संसद्बाट २-२ पटक पारित भएर गएको विधेयक संसद्मा फिर्ता आउनु हुँदैन र त्यहीँबाट प्रमाणित नै हुनुपर्दछ, मन्त्रिपरिषद्ले नै निर्णय गरेर राष्ट्रपतिसँग सल्लाह गरेर नागरिकता विधेयक प्रमाणीकरण गर्ने विषयमा सरकार सक्रिय भइदिनुपर्याे'-सांसद् निधिले भन्नुभयाे ।
