काठमाडाैं । नेकपा एमालेका अध्यक्ष केपी शर्मा ओलीले नेपाली कांग्रेसका सांसद् चन्द्र भण्डारीसँग भेट गर्नुभएकाे छ ।
बुधबार बसेकाे प्रतिनिधि सभा बैठकमा सरकारको नीति तथा कार्यक्रमाथिको छलफलमा सहभागी भएर सभामुख देवराज घिमिरेको कार्यकक्षमा रहनुभएका भण्डारीलाई अध्यक्ष ओलीले त्यहिँ पुगेर भेट्नुभएकाे हाे ।
आफ्नो स्वास्थ्य लाभको कामना गरेकोमा ओलीलाई भण्डारीले धन्यवाद दिनुभएकाे सभामुखकाे सचिवालयले जनाएकाे छ । 'मेरो बारेमा तपाइँले भन्नुभएको सुनेँ, गुल्मीमा पनि बोल्नुभएको सुनेँ, गुल्मीबाट पनि स्वास्थ्य लाभको कामना गर्नुभयो, थ्यांक यू सो मच' - भण्डारीले ओलीसँग भन्नुभयाे । आमाकाे निधन भएकाे कुरा पनि आफूले २ महिनापछि मात्रै थाहा पाएकाे भण्डारीले ओलीलाई सुनाउनुभयाे ।
त्यसक्रममा ओलीले भण्डारीलाई निकाे भएर आउनुहुन्छ भन्ने विश्वास रहेकाे सुनाउनुभयाे । अध्यक्ष ओलीले भन्नुभयाे - 'तपाइँ निकाे भएर फर्केर आउनुहुन्छ भन्ने विश्वास थियो, निको भएर आएपछि भेट भयो, खुशी लागेको छ ।'
नेपालमा जलन अस्पताल आवश्यक रहेको भन्दै भण्डारीले तत्कालै काम सुरु गर्न पहल गर्न ओलीसँग आग्रह गर्नुभयाे । ३ महिनापछि भण्डारीले बुधबार सदनमा सम्बाेधन गर्नुभएकाे हाे । सभामुखले नै भण्डारीको इच्छाअनुसार नीति तथा कार्यक्रममा बोल्न विशेष व्यवस्था मिलाउनुभएको थियो ।
सभामुख घिमिरेले एक साताअघि निवासमै गएर भण्डारीसँग भेट गर्नुभएको थियो ।
