काठमाडौं । प्रतिनिधि सभा सदस्य पदम गिरीले जुनसुकै व्यक्तिले जुनसुकै रूपमा भ्रष्टाचार गरेको भए पनि त्यसको छानबिन हुनु पर्ने कुरामा नेकपा एमाले स्पष्ट रहेको बताउनुभएको छ ।
शुक्रबार प्रतिनिधि सभा बैठक सुरु हुने बित्तिकै एमाले अध्यक्ष केपी शर्मा ओली माथि सत्ता पक्षका सांसदहरूले नियोजित रूपमा आरोप लगाएको भन्दै एमाले सांसदले उठेर विरोध जनाएका थिए । त्यस पछि सभामुखले प्रतिनिधि सभामा प्रमुख प्रतिपक्षी दलका प्रमुख सचेतक गिरीलाई बोल्ने समय दिनुभएको थियो ।
बैठकमा बोल्दै गिरीले एमाले अध्यक्ष केपी शर्मा ओली प्रधानमन्त्री हुँदा पशुपति नाथको जलारी राख्दा सुनको भनेर तामाको राखेको भन्ने आरोप सत्ता पक्ष नेकपा माओवादी केन्द्रका सांसद् लेखनाथ दाहाल (राजन) ले लगाएको भन्दै आपत्ति जनाउनुभयो । गिरीले सो जलारी सुनको हो वा पित्तलको हो तत्काल सरकारले छानबिन गरी प्रतिनिधि सभामा जानकारी दिन माग गर्नुभयो । उहाँले त्यसको छानबिन गरी प्रतिनिधि सभामा जानकारी नगराएसम्म बैठक अघि नबढ्न नदिने गिरीले बताउनुभयो ।
गिरीले प्रतिनिधि सभामा प्रतिपक्षी दलको नेता माथि त्यस्तो गम्भीर आरोप लगाउने सांसद् दाहालले प्रतिनिधि सभामा माफी माग्नु पर्ने र उहाँले बोलेको कुरा रेकर्डबाट हटाउनु पर्ने माग गर्नुभयो ।
