काठमाडौं । प्रतिनिधि सभा सदस्य विश्वप्रकाश शर्माले नेपाल देश लोकतान्त्रिक गणतन्त्रको सही नीतिमा अघि बढेको बताउनुभएको छ ।
शनिबार प्रतिनिधि सभामा सरकारको नीति तथा कार्यक्रममाथिको छलफलमा भाग लिँदै शर्माले नीति सही भए पनि थिति सही बसाल्न नसकेको बताउनुभयो । ‘नीति सही अपनाएको छौँ, तर थिति सही बसाउन सकेका छैनौँ, गति जनताको अपेक्षा अनुसार बढाउन सकेका छैनौँ’, उहाँले भन्नुभयो ।
जनताको अवस्था बदल्ने र व्यवस्था बसाल्न अहिलेकै शैलीको नीति तथा कार्यक्रमले काम गर्न नसक्ने उहाँले बताउनुभयो । सरकारको नीति तथा कार्यक्रम चैत महिनामा नै ल्याउनु पर्ने शर्माले बताउनुभयो ।
जब जब संयम र विवेकलाई सही ठाउँमा राखियो त्यति बेला उपलब्धि प्राप्त भएको उहाँले स्मरण गराउनुभयो । आवेगले सधैँ दुर्घटनामा पुर्याएको उहाँले स्मरण गराउनुभयो । आवेगको परिणाम गिरिजाप्रसाद कोइराला, प्रचण्ड र केपी ओलीको सरकार दुर्घटनामा परेको उहाँले स्मरण गर्नुभयो । ‘अहङ्कारको वृक्षमा विनाशको फल फल्छ’, उहाँले भन्नुभयो ।
शर्माले नेपालका नेता एक आपसमा झुक्न सके दुनियाँका कुनै शक्तिका सामु झुक्नु नपर्ने शर्माले बताउनुभयो । नेपालका नेताहरूले एकबाट अर्काले सिक्न सके विश्वका कसैसँग सिक्नु नपर्ने उहाँको भनाइ छ । ‘क्रोध र आवेशले हाम्रो अवस्था रूपान्तरण हुन सक्दैन’, शर्माले भन्नुभयो ।
उहाँले थिति र विधिमा बसेर काम गर्नुपर्नेमा जोड दिनुभयो । प्रमुख प्रतिपक्षी दलका नेता केपी शर्मा ओलीले नक्कली भुटानी शरणार्थी प्रकरणमा निर्दोषलाई फसाउन खोजिँदै छ भनि दिएको अभिव्यक्ति प्रति उहाँले आलोचना गर्नुभयो । ‘यहाँबाट फैसला सुनाउनका लागि हामी न्यायाधीश होइनौँ’, उहाँले भन्नुभयो ।
अनुसन्धान, गिरफ्तारी र मुद्दामा छानबिन गर्ने कानुन निर्माणमा कसले ध्यान दियो भन्ने कुरामा जोड दिनु पर्ने उहाँले बताउनुभयो । भ्रष्टाचार निवारण ऐन निर्माणमा कांग्रेसले काम गरेको उहाँको भनाइ छ ।
भ्रष्टाचारका सबै फाइल खोल्नु पर्नेमा उहाँले जोड दिनुभयो । तर त्यस्ता फाइल खोल्दा कसलाई फसाउन सकिएला भन्ने पुर्वाग्रह राख्नु नहुनेमा उहाँले सतर्क गराउनुभयो ।
