काठमाडौं । राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले नीति तथा कार्यक्रममा छलफल भएका विषय नसमेटिने भए किन छलफल गरियाे भन्दै प्रश्न गर्नुभएकाे छ ।
शनिबार बसेकाे प्रतिनिधि सभा बैठकमा प्रधानमन्त्री पुष्पकमल दाहाल प्रचण्डले नीति तथा कार्यक्रममाथि दिएकाे जवाफमा स्पष्टिकरण साेध्दै प्रमुख सचेतक शाहीले नीति तथा कार्यक्रममाथिकाे छलफलमा दिइएका विषय नसमेटिने भए लाखौँ खर्च किन गरेको भन्दै प्रश्न गर्नुभयाे ।
'नीति तथा कार्यक्रममा छलफल गरेकाे कुरा लेखिँदैन भन्नुभयाे, छलफल गरेर लाखाैं रुपैयाँ खर्च किन गरेकाे ? कानुनै छैन नीति नै छैन भन्नुभयाे, कानुन चाहिँ कसले बनाउने हाे, नीति कसले बनाउने ? माथिबाट एलियन आएर बनाउने त होइन होला ? यही संसद्ले बनाउने हाे'- उहाँले भन्नुभयाे ।
नीति तथा कार्यक्रमा आएका विषय समेट्न प्रमुख सचेतक शाहीले सरकारसँग माग गर्नुभयाे । नीति तथा कार्यक्रममा उठेका विषयमा नसमेटिने भए सदनमा छलफल गर्नुकाे औचित्य नहुने बताउँदै शाहीले भन्नुभयाे - 'यी विषय नसमेटिने हाे भने टेलिभिजनमा अन्तर्वार्ता दिँदै हिँडे भइगयाे नि ।'
