काठमाडौं । स्वास्थ्य क्षेत्रमा पनि चालु आर्थिक वर्षको तुलनामा स्वास्थ्य क्षेत्रमा पनि बजेट बढाएको छ ।
सोमबार संघीय संसद्को संयुक्त बैठकमा सरकारको आर्थिक वर्ष २०८०÷०८१ को बजेट प्रस्तुत गर्दै अर्थमन्त्री डा. प्रकाशशरण महतले स्वास्थ्य क्षेत्रको बजेट बढेको जानकारी दिनुभयो । आउने आर्थिक वर्षको लागि स्वास्थ्य तथा जनसङ्ख्या मन्त्रालय तर्फ ८३ अर्ब ९९ करोड विनियोजन गरिएको महतले बताउनुभयो ।
सरकारले शुक्रराज ट्रपिकल तथा सरुवा रोग अस्पताल टेकुलाई ३ सय शय्यामा विस्तार गर्ने भएको छ । जसका लागि ४६ करोड रुपैँया विनियोजन गरिएको छ ।
भरतपुर, पोखरा, सुर्खेत र डोटीमा निर्माण भइरहेका प्रादेशिक सरुवा रोग अस्पताल आगामी वर्ष सम्पन्न गरी सञ्चालनमा ल्याइने महतले बताउनुभयो ।
देश भरका स्वास्थ्य संस्थाबाट ९८ प्रकारका औषधि, खोप लगायतका आधारभूत स्वास्थ्य सेवा सरकारले निःशुल्क उपलब्ध गराउने भएको छ । मुलुकभरका ६ हजार ७ सय ४३ वडाका आधारभूत स्वास्थ्य सेवा केन्द्रबाट सो सेवा प्रदान गरिने महतले जानकारी दिनुभयो । औषधि, खोप लगायतका आधारभूत स्वास्थ्य सेवा निःशुल्क उपलब्ध गराउन १ अर्ब २८ करोड विनियोजन गरेको उहाँले बताउनुभयो ।
सो मन्त्रालयको चालु आर्थिक वर्षको बजेट ६९ अर्ब ३८ करोड रुपैँया रहेको छ । स्वास्थ्य क्षेत्रको लागि प्रदेशतर्फ ६ अर्ब २६ करोड रुपैँया केन्द्र सरकारले छुट्याएको थियो । त्यस्तै स्थानीय तहका लागि २७ अर्ब ४४ करोड रुपैँय प्रदान गरेको थियो ।
