काठमाडौं । प्रधानमन्त्री पुष्पकमल दाहाल प्रचण्डले भारत भ्रमणका क्रममा आफूले सीमाबारे कहीँ पनि विकल्प नदिएको दाबी गर्नुभएकाे छ ।
साेमबार बसेकाे प्रतिनिधि सभा बैठकलाई सम्बाेधन गर्दै प्रधानमन्त्री प्रचण्डले कालापानी, लिपुलेक र लिम्पियाधुरासँग भूमि साट्ने प्रस्ताव आफूले भारत भ्रमणका क्रममा कहिँ पनि नगरेकाे दाबी गर्नुभयाे ।
सीमाबारे याे विकल्प हुन्छ वा यसमा जाऔं भनेर कुनै प्रस्ताव नगरेको उहाँले दाबी गर्नुभयाे । 'लिम्पियाधुरा, लिपुलेक र कालापानी भारतलाई दिएर बंगलादेशसम्म पुग्न मार्ग मागेको कुरामा सत्यता छैन' - प्रधानमन्त्री प्रचण्डले भन्नुभयाे ।
उहाँले मिचिएको भूमि कालापानी, लिपुलेक र लिम्पियाधुरा लगायत भूमि नेपालको हो भनेर स्थापित गर्न आफूले भूमिका खेलेको दाबी गर्नुभयाे । प्रधानमन्त्री प्रचण्डले भन्नुभयाे - 'हामीले भनेका छौँ कालापानी, लिपुलेक, लिम्पियाधुरा नेपालको भूमिका हो, नेपालको भूमि हो भन्ने कुरा स्थापित कुरा सबैभन्दा ठूलो कुरा हो भन्नेमा म स्पष्ट छु, जबसम्म दीर्घकालीन समाधान हुँदैन, नेपाल-भारत बीचको समस्या समाधान हुन सक्दैन ।'
उहाँले भारतीय प्रधानमन्त्री नरेन्द्र मोदीसँग सीमाकाे विषयमा आफूले प्रष्ट कुरा राखेकाे र माेदीले पनि प्रष्टै कुरा राखेकाे दाबी गर्नुभयाे । सिमानाको समस्या हल गर्नुपर्छ भनिएको प्रधानमन्त्री स्तरबाट पहिलोपटक भएको दाबी गर्दै प्रचण्डले भन्नुभयाे - 'सीमा समस्या हाल गर्नुपर्छ, प्रधानमन्त्री स्तरबाट बोलिएको पनि यो पहिलो पटक हो, हामीले यो समस्या स्थायी रूपमा समस्या समाधान होस् भन्ने चाहेका छौँ ।'
