काठमाडौं । प्रतिनिधि सभा सदस्य ठाकुरप्रसाद गैरेले प्रधानमन्त्रीको गेरु वस्त्र भित्रको राज के हो ? भन्ने प्रश्न गर्नुभएको छ ।
सोमबार प्रतिनिधि सभा बैठकमा प्रधानमन्त्रीको वक्तव्य माथि प्रश्न गर्दै गैरेले भन्नुभयो, ‘राजनीतिक वार्ता गर्यौँ भन्नुभएको छ, त्यसको अर्थ के हो ? बुद्धिजीको टेको लगाएर राष्ट्रघाती गर्ने अधिकार कहाँबाट पाउनुभयो ।’
बुद्धिजीवीले भनेका थिए भनेर बाटोसँग कालापानी, लिपुलेक लिम्पियाधुरा साट्ने कुरा गरेको हुँ भन्न प्रधानमन्त्रीलाई शरम लाग्नु पर्ने उहाँले बताउनुभयो । ‘यो देशको जमिन एक इञ्च हामी कुनै विदेशीलाई दिन तयार छैनौँ’, उहाँले भन्नुभयो ।
उहाँले नक्सा सम्बन्धी दिएको अभिव्यक्ति अत्यन्त गम्भीर भएको बताउनुभयो । हिजो सदनमा के भएको थियो भन्ने समेत थाहा नपाउने प्रधानमन्त्री देख्दा आफूहरू लज्जित भएको उहाँले बताउनुभयो । राष्ट्रपतिले गरेको गैरसंवैधानीक प्रमाणीकरणको कुरा संसदमा उठेकोमा प्रधानमन्त्रीले अरू नै बुझेको भन्दै उहाँले आलोचना गर्नुभयो । विधेयकमा के छ भन्ने प्रश्न सदनमा आएर छलफल भए पछि मात्रै उठाउने उहाँले प्रष्ट पार्नुभयो ।
