काठमाडौं । प्रधानमन्त्री पुष्पकमल दाहाल प्रचण्डले सरकारले राष्ट्रपतिलाई प्रमाणीकरणको लागि सिफारिस गरेको नागरिकता विधेयक संविधानसम्मत भएको तर्क गरेपछि प्रतिपक्षी सांसदले रोष्टममा बोल्दा बोल्दै रोकेका छन् ।
प्रधानमन्त्रीले संविधान विपरीत काम गरेर उल्टै संसद्लाई ढाँटेको भन्दै प्रतिपक्षी दलका सांसदहरूले विरोध जनाएका हुन् । प्रतिपक्षी दलका सांसदले विरोध जनाए पछि प्रधानमन्त्री बोल्दा बोल्दै रोकिन बाध्य हुनुभएको थियो ।
प्रधानमन्त्रीले पटक पटक आफ्नो तर्क सुनिदिन आग्रह गर्नुभएको भए पनि आक्रोशित बनेका प्रतिपक्षी सांसदहरूले होहल्ला गरेर लगातार विरोध ज्याउनुभएको थियो ।
प्रधानमन्त्रीले यस अघिका राष्ट्रपति विद्यादेवी भण्डारीले विधेयक पास नगरेर संविधान मिचेको र आफूहरूले त्यसलाई सच्याउने काम गरेको तर्क दिनुभएको थियो । सरकारको सिफारिसमा राष्ट्रपति रामचन्द्र पौडेलले प्रमाणीकरण गरेको नागरिकता विधेयक तत्काल कार्यान्वयनमा नल्याउन सर्वोच्च अदालतले अल्पकालीन आदेश जारी गरिसकेको छ ।
प्रतिपक्षका सांसदहरूले हो हल्ला गरेपछि सत्ता पक्षका सांसदले समेत हो हल्ला गरेका थिए । पक्ष विपक्ष भएर दोहोरी खेल्न लागेपछि संसद्को कारबाही अघि नबढ्ने भन्दै सभामुख देवराज घिमिरेले सांसदहरूलाई संयमित हुन आग्रह गर्नुभएको थियो ।
सांसदहरूले उहाँको अभिव्यक्तिको विरोध जनाएर होहल्ला गरेपछि प्रधानमन्त्रीले दिक्दारी प्रकट गर्नुभएको थियो । तल सांसदले हल्ला गरेपछि प्रचण्ड नर्मस हुनुभएको थियो । ‘मेरो पुरै कुरा सुनेपछि विरोध गरे हुन्छ नि’, उहाँले भन्नुभयो ।
प्रधानमन्त्री रोष्टममा नै उभिनुभएको बेला प्रतिपक्षी सांसदको तर्फबाट नियमापत्ति जनाउने सांसद रघुजी पन्तलाई बोल्न सभामुखले समय दिनुभएपछि पुनः माओवादीका सांसदले हो हल्ला गरेका थिए । माओवादीका सांसदले हो हल्ला गरेपछि प्रतिपक्षका सांसदहरू थप आक्रोशित भएका थिए । सो विधेयकको विषय अदालतमा रहेकोले प्रधानमन्त्रीले त्यसमा कुनै पनि प्रकारको बचाउ गर्न नमिल्ने पन्तले बताउनुभयो ।
सत्ता पक्षका सांसद विश्वप्रकाश शर्माले संसदमा एउटा सांसदले बोल्दै गर्दा अर्कोले हल्ला गर्नु राम्रो नहुने बताउनुभयो । त्यस्तै प्रधानमन्त्रीले बोल्दा पनि संयमित भएर सुन्नु पर्ने उहाँले बताउनुभयो ।
