काठमाडाैं । प्रधानमन्त्री पुष्पकमल दाहाल प्रचण्डले नागरिकता विधेयक प्रमाणीकरण गरेर संविधान ट्रयाकमा आएको दाबी गर्नुभएकाे छ ।
सोमबार बसेकाे प्रतिनिधि सभा बैठकमा सांसद्हरुले राखेका प्रश्नको जवाफ दिँदै प्रधानमन्त्री प्रचण्डले प्रक्रिया पूरा गरेपछि स्वीकृतिका लागि पुगेको वियेधक राष्ट्रपति रामचन्द्र पाैडेलबाट प्रमाणीकरण भएको बताउनुभयाे ।
विधेयक प्रमाणीकरण भएकै कारण संविधान ट्रयाकमा आएको दाबी गर्दै उहाँले जनताको हितलाई राखेर नै दुवै सदनबाट पारित भएको नागरिकता विधेयक प्रमाणीकरणका लागि सरकारले अनुरोध गरेको बताउनुभयाे । दुवै सदनबाट विधेयक पारित गरेर पठाउँदा फेरि राष्टपतिले दराजमा हाल्दिए लोकतन्त्रमाथि घात हुने खतरा देखेको दाबी पनि प्रधानमन्त्री प्रचण्डले गर्नुभयाे । दुवै सदनले विधिसम्मत तरिकाले पठाएको विधेयक अर्को संसद्ले मान्दिन भन्न नमिल्ने तर्क समेत उहाँले गर्नुभयो ।
प्रधानमन्त्री प्रचण्डले भारत भ्रमणका क्रममा कैयाैं विषयमा छलफल भएको र राष्ट्रिय हित तथा स्वाधिनताको विषयमा सरकार चिन्तित रहेको बताउनुभयो । उहाँले आफू धर्मनिरपेक्षतावादी भएको र जनताको धार्मिक आस्थालाई अपमान हुने काम गर्न हुँदैन भन्ने मान्यता रहेको पनि बताउनुभयाे ।
नेपाल-भारत सीमा विवादका विषयमा दुवैपक्ष बसेर छलफल गर्नुपर्ने प्रधानमन्त्री प्रचण्डले बताउनुभयो ।
