काठमाडाैं । राष्ट्रिय प्रजातन्त्र पार्टी (राप्रपा) का प्रमुख सचेतक ज्ञानेन्द्र शाहीले बजेट निर्माणमा अनधिकृत व्यक्तिको संलग्नताबारे संसदीय छानबिन समिति गठन बनाएर छानबिन गर्न माग गर्नुभएकाे छ ।
मंगलबार बसेकाे प्रतिनिधि सभा बैठकमा समय लिएर बाेल्दै प्रमुख सचेतक शाहीले बजेटमा अनधिकृत व्यक्तिको संलग्नता रहेको भनी प्रश्न उठ्नु गम्भीर विषय भएकाे बताउनुभयाे ।
बजेट निर्माणको गोप्य बैठकमा अनधिकृत व्यक्तिले कसरी प्रवेश पाए भन्दै उहाँले प्रश्न गर्नुभयाे । 'भन्सार विभागका उपसचिव स्तरका कर्मचारी समेत प्रवेश नपाउनुपर्ने संवेदनशील क्षेत्रमा पूर्व नासु श्रेष्ठले कसरी प्रवेश पाए ? यसकाे जवाफ चाहिन्छ श्रेष्ठलाई कसकाे स्वार्थका लागि कसकाे प्रतिनिधि बनाएर कुन स्वार्थ पूर्तिका लागि आर्थिक विधेयक बनाउन अति गाेप्य कक्षमा लगिएकाे हाे ?'- शाहीकाे प्रश्न छ ।
पूर्वकर्मचारी रामकृष्ण श्रेष्ठलाई किन करारमा नियुक्त गरियाे भन्ने प्रश्न पनि उहाँले गर्नुभयाे । सरकारबाट स्पष्ट जवाफ नआएसम्म सदनबाट विरोध गरिरहने चेतावनी समेत शाहीले दिनुभयाे ।
