काठमाडाैं । नेकपा एमालेका अध्यक्ष केपी शर्मा ओलीले नेपाल र नेपालीकाे हितकाे प्रतिनिधित्व गर्न नसकेकाे बताउनुभएकाे छ ।
मंगलबार बसेकाे प्रतिनिधि सभा बैठकमा बजेटमाथिकाे छलफलमा बाेल्दै अध्यक्ष ओलीले बजेटले राष्ट्रमा उत्साह र विश्वासकाे लहर सृजना गर्ने कार्ययाेजना ल्याउन नसकेकाे बताउनुभयाे ।
उहाँले भन्नुभयाे - 'याे बजेटले आम नेपालीकाे हितकाे प्रतिनिधित्व गर्न सकेन, ११ सय वटा गाडी ल्याउनेकाे हित त पक्कै भएहाेला, ११ सय गाडी भुलचुक भएर आफैं गुडेर आएकाे त हाेइन ? त्यहाँ त बहुत नयाँ क्यालकुलेटर चलेको छ, त्यहाँ आर्टिफेसियल इन्टेलिजेन्सले काम गरेको छैन, त्यहाँ सेटिङले काम गरेको छ ।'
बजेटमा यस्ता गाडीहरुको कर बढ्दै छ भन्ने जानकारी पहिल्यै दिइएकाले त्यस्ता गाडी बजेट अघि नेपाल भित्रिएकाे समेत अध्यक्ष ओलीले बताउनुभयाे । व्यवसायीले कर बढाइएका गाडी बजेट पूर्व नै ल्याउँदा राज्यलाई करमा ९० करोड घाटा लागेको उहाँले बताउनुभयाे ।
नेपाल, नेपाली जनता र उनीहरुका आकांक्षालाई बजेटले सम्बाेधन नगरेकाे भन्दै अध्यक्ष ओलीले यस्ताे निराशाजनक बजेट नेपाल र नेपालीकाे हितमा हुन नसक्ने बताउनुभयाे । उहाँले यसलाई नाेट गरेर राख्न समेत सुझाव दिनुभयाे ।
प्रतिपक्षले देश र जनताकाे हितलाई ध्यानमा राखेर अनुभवमा आधारित रहेर सुझाव दिएपनि ती सुझावकाे अनादर गरिएकाेमा आपत्ति जनाउँदै उहाँले अर्थतन्त्रकाे समस्या नै पहिचान नगरी सरकारले बजेट ल्याएकाे बताउनुभयाे ।
बजेटले देशले भाेगिरहेकाे अर्थतन्त्रकाे प्रमुख समस्या पहिचान गर्न नसकेकाे र यथार्थ तथ्य सार्वजनिक गर्ने जिम्मेवारी पनि सरकारले पूरा नगरेकाे बताउनुभयाे । देशका लागि केही हाेस भनेर प्रतिपक्षले सुझाव दिने गरेकाे प्रष्ट पार्दै उहाँले भन्नुभयाे - 'यो बजेट नाडी नछामीकन र आँखा नहेरीकन ल्याइएकाे छ ।'
