काठमाडाैं । प्रधानमन्त्री पुष्पकमल दाहाल प्रचण्डले भारत भ्रमणबाट फर्किँदा बधाई, धन्यवाद र स्वागत नपाएकाे गुनासाे गर्नुभएकाे छ ।
बुधबार बसेकाे राष्ट्रिय सभा बैठकमा बाेल्दै प्रधानमन्त्री प्रचण्डले भारत भ्रमणका क्रममा ऐतिहासिक उपलब्धि भएको र त्यस्ताे उलब्धिसाथ फर्किँदा पनि नेपालमा भव्य स्वागत नगरिएकाे गुनासाे गर्नुभयाे ।
'भारतबाट फर्किएर आउँदा सत्तापक्ष, प्रतिपक्ष, नागरिक समाज सबैले मलाई बधाई दिन्छन् भन्ने साेचेर आएकाे थिएँ, भव्य स्वागत हुन्छ भन्ने सोचेको थिएँ, किनकी नेपालकाे इतिहासमा युगान्तकारी परिवर्तन भएका छन्, तर पहिलाेपटक सीमा सम्बन्धी समस्या हामी हल गर्छाैं भनेर दुवै देशका प्रधानमन्त्रीले दुनियाका अगाडि उभिएर घाेषणा गर्नु सानाे कुरा हाेइन'- उहाँले भन्नुभयाे ।
नेपालकाे विजुली पहिला नेपालमा उपभाेग गर्ने र त्यसपछि मात्र भारतलाई बेच्नुपर्छ भनेर आफूले भनेकाे दाबी गर्दै प्रधानमन्त्री प्रचण्डले नेपाललाई बिजुलीकाे बजार चाहिएकाे दाबी गर्नुभयाे । भारतकाे प्रधानमन्त्रीले प्रेसकाे अगाडि उभिएर १० वर्षभित्र १० हजार मेगावाट बिजुली किन्ने घाेषणा गर्नु एेतिहासिक उपलब्धि भएकाे उहाँले दाबी गर्नुभयाे । 'नेपालकाे विकासले एउटा नयाँ गति लिने आधार बन्याे भनेर यसमा त सबै खुशी हुनुपर्ने, गर्व गर्नुपर्ने सरकारलाई बधाई र धन्यवाद भन्नुपर्ने, विकास र समृद्धिकाे कुरामा त सबै नेपाली एक ठाउँमा रहेछन् भन्ने देखाएपाे हाम्राे हात अझ बलियाे हुँदै जान्थ्याे, सबै छाेडेर आइस् भनेपछि सहयाेग गर्नेले पनि किन गर्ने भन्ने वातावरण बनाइनु दु:खद हाे'- प्रचण्डले भन्नुभयाे ।
जमिन सट्टापट्टाबारे कुनै पनि औपचारिक बैठकमा आफूले कुरा नगरेकाे दाबी उहाँले पटकपटक गर्नुभयाे । भारतसँग नभएर मिडियामा बंगलादेश माेडलबारे अध्ययन गर्न सकिन्छ मात्रै भनेर मात्रै आफूले भनेकाे कुरालाई ताेडमाेड गरिएकाे र जमिनै साटेजसरी कुरा गरिएकाे भन्दै प्रधानमन्त्रीले असन्तुष्टि जनाउनुभयाे ।
ईपीजी, कालापानी, पञ्चेश्वर लगायत सीमा समस्या लगायत सबै कुरा भारतसँग भएकाे दाबी गर्दै उहाँले भारतकाे भ्रमणमा गेम चेञ्ज गर्ने हिसाबले समझदारी अगाडि बढेकाे दाबी प्रधानमन्त्री प्रचण्डले गर्नुभयाे । उहाँले भन्नुभयाे - 'यति राम्राे काम हुँदाहुँदै पनि, सकी नकसी आलोचना गरिएकाे छ ।' कैयाैं उपलब्धि हुँदा पनि भारत भ्रमणकाे उपलब्धि भनेकाे मुर्रा भैंसी मात्र भनेर भन्नु गलत भएकाे बताउनुभयाे ।
वैशाख २४ गते नै नागरिकता विधेयक प्रमाणीकरण गर्न उचित हुन्छ भनेर भनेकाे भएपनि राष्ट्रपतिले पनि सल्लाह लिन समय मागेकाले १७ गते मात्र प्रमाणीकरण जुरेकाे बताउनुभयाे । आफू भारत जाने दिन नै राष्ट्रपतिले कानुनविद्सँग सल्लाह गरेर टुंग्याएपछि प्रमाणीकरण गर्नुभएकाे दाबी प्रचण्डले गर्नुभयाे । भारत जाने दिन प्रमाणीकरण हुन संयाेग मात्रै भएकाे दाबी समेत उहाँले गर्नुभयाे ।
प्रधानमन्त्री प्रचण्डले जेठ १७ देखि २१ गतेसम्म चार दिने भारत भ्रमण गर्नुभएकाे थियाे ।
