काठमाडाैं । राष्ट्रिय स्वतन्त्र पार्टी (रास्वपा) का सभापति रवि लामिछानेले सरकारकाे विनियाेजन विधेयकका प्राथमिकता र सिद्धान्त, नीति तथा कार्यक्रम र बजेटबीच तालमेल नभएकाे बताउनुभएकाे छ ।
बिहीबार बसेकाे प्रतिनिधि सभा बैठकमा बजेटमाथिकाे छलफलमा बाेल्दै सभापति लामिछानेले बजेट यी तीन कार्यक्रम हेर्दा एउटै सरकारले नल्याएकाे जस्ताे देखिएकाे बताउनुभयाे । उहाँले भन्नुभयाे - 'सरकारकाे विनियाेजन विधेयकका प्राथमिकता र सिद्धान्त, नीति तथा कार्यक्रम र बजेट हेर्दा एउटै सरकारले ल्याएकाे हाे कि फरक फरक सरकारका पालामा आएकाे भन्ने कुरामा म दाेधारमा परेकाे छु, किनभने यी कार्यक्रमबीच कुनै तालमेल देखिएकाे छैन ।'
बहुमतकाे आधारमा हचुवाकाे भरमा अनुमान गरिएकाे राजश्वमा आधारित आधारमा बजेटलाई पास गरेर अगाडि जाने हाे भने पास गर्ने सबैले जिम्मेवारी लिनुपर्ने बताउनुभयाे । परम्पराका नाममा बहुमतकाे बलमा पेलेर जान खाेजे त्यसकाे क्षति देशले भाेग्नुपर्ने बताउनुभयाे ।
यसपटककाे विकास बजेट डडेल्धुरा, नुवाकाेट र गाेरखामा कति पार्नुभएकाे छ ? भन्ने प्रश्न गर्दै अर्थमन्त्री डा. प्रकाशशरण महतलाई सभापति लामिछानेले विकास बजेटकाे करिब ४० देखि ५० प्रतिशत बजेट यी जिल्लामा छुट्याइएकाे सुन्नमा आएकाे बताउनुभयाे । यसबारे प्रष्ट पार्न अर्थमन्त्रीलाई आग्रह गर्दै उहाँले मधेशलाई बजेटमा गरिएकाे विभेदबाट बताइदिन पनि अर्थमन्त्रीलाई आग्रह गर्नुभयाे ।
रास्वपा नागरिकता विधेयक भनेर जनतामा भाष्य सृजना गरिएकाेमा आपत्ति जनाउँदै उहाँले याे गलत भएकाे बताउनुभयाे । रास्वपाले विधेयककाे विषयवस्तु नभएर विधेयक प्रमाणीकरणकाे प्रक्रियामा विराेध गरेकाे प्रष्ट पार्दै सभापति लामिछानेले साे विधेयकमा वैवाहिक अंगिकृतकाे विषयमा महिला र पुरुषमा विभेद गरिएकाे बताउनुभयाे । यसलाई सदनलाई ल्याएर छलफल गर्नुपर्ने पक्षमा रास्वपा रहेकाे उहाँले बताउनुभयाे ।
सदनलाई मर्यादित बनाउनुपर्नेमा त्यसाे हुन नसकेकाे भन्दै सभापति लामिछानेले सदनलाई मर्यादित बनाउन आग्रह गर्नुभयाे । 'संसद्को गरिमा राख्नलाई कहीँ कतै चुकिरहेका त छैनौं ? यसबारेमा ध्यानाकर्षण गराउँछौं, जस्ताजस्ता विषयमा छलफल गर्यौं, त्यसबाट हामी लज्जित भएका छौं, भैँसी र राँगोको विषयमा गफ गरेर ५ वर्ष बिताउने हो भने हामीले गोबरबाहेक केही पाउँदैनौं'- उहाँले भन्नुभयाे ।
यसबीचमा आफ्ना सांसद्बाट भएका केही अमर्यादित टिप्पणीबारे लामिछानेले माफी माग्नुभयाे ।
