काठमाडाैं । प्रमुख प्रतिपक्षी नेकपा एमालेले काेशी प्रदेशमा आफ्ना नेता तथा जनप्रतिनिधिमाथि भएकाे आक्रमणकाे घाेर भर्त्सना तथा निन्दा गरेकाे छ ।
बिहीबार बसेकाे प्रतिनिधि सभामा विशेष समय लिएर बाेल्दै एमाले प्रमुख सचेतक पदम गिरीले एमाले कोशी प्रदेश संसदीय दलका उपनेता राम राना, उपसभामुख सिर्जना दनुवार र त्रियुगा नगरपालिकाका उपप्रमुख महेश्वरी राईमाथि भएकाे आक्रमणकाे निन्दा गर्नुभयाे ।
कोशी प्रदेशमा एमालेका नेता-कार्यकर्तामाथि सत्तारुढ दलका कार्यकर्ताले समेतकाे संलग्ननता आक्रमण भएकाे भन्दै उहाँले घटनाबारे यथाशीघ्र सत्य तथ्य जानकारी गराउन सरकारसँग माग गर्नुभयाे । यस घटनाकाे यथार्थ जानकारी नगराए भाेलिदेखि सदन चल्न नदिने चेतावनी समेत प्रमुख सचेतक गिरीले दिनुभयाे ।
एमालेका नेता-कार्यकर्तामाथि निरन्तर आक्रमण प्रयास भइरहेकाे भन्दै उहाँले विगतमा पार्टी अध्यक्ष केपी शर्मा ओलीमाथि पनि आक्रमण भएकाे स्मरण गराउनुभयाे । सत्तारुढ दलका कार्यकर्ताकै संलग्ननतामा एमालेका नेता-कार्यकर्तालाई लक्षित गरेर विभिन्न ठाउँमा आक्रमण गर्ने, शान्तिपूर्ण कार्यक्रममा अवराेध सृजना गर्ने, ढुंगामुढा गर्ने, आतंक सृजना गर्ने, असुरक्षा र अशान्ति सृजना गर्ने काम भइरहेकाे भन्दै प्रमुख सचेतक गिरीले आपत्ति जनाउनुभयाे ।
'विगतमा हाम्राे पार्टीका अध्यक्ष झापामा जाँदा ढुंगामुढा गर्ने शान्ति भंग गर्ने आतंक सृजना गर्ने काेशिस भएकाे थियाे यसबारे हामीले सदनलाई ध्यानाकर्षण गराएका थियाैं, आज मात्रै कोशी प्रदेशकाे हाम्राे संसदीय दलका उपनेता राम राना इलाममा कार्यक्रममा गइरहेका बेला इलाममा घेराबन्दी गर्ने र मोबिल छर्केर आगो लगाउनेसम्मको घटना भएको छ, त्यही सन्दर्भमा कोशी प्रदेशका उपसभामुख सिर्जना दनुवार र त्रियुगा नगरपालिको उपप्रमुख महेश्वरी राई चढेकाे गाडीमाथि ढुंगा मुढा भएको छ। आतंक सिर्जना गर्ने काम भएको छ, उहाँहरु मुस्किलले सुरक्षित स्थानमा जानुभएकाे छ'- उहाँले भन्नुभयाे ।
एमालेका नेता-कार्यकर्ता र जिम्मेवार राजनीतिक व्यक्तित्वमाथि भइरहेकाे निरन्तरकाे हमला अब सह्य नहुने भन्दै प्रमुख सचेतक गिरीले त्यसकाे सशक्त प्रतिवाद गर्ने चेतावनी दिनुभयाे । 'यसरी हाम्रा नेता-कार्यकर्ता र जिम्मेवार राजनीतिक व्यक्तित्वमाथि जुन प्रकारले हमला हुँदैछ, आक्रमण हुँदैछ, याे अत्यन्त निन्दनीय छ, हामी यसलाई अब सहन सक्ने अवस्थामा छैनाैं, यस घटनामा सत्तारुढ दलका कार्यकर्ताहरू समेत संलग्न भएको जानकारी आएकाे छ, याे यथार्थ के हाे ? त्याे आक्रमणमा काे-काे सहभागी थिए ? यी विषयमा सरकारले यथाशीघ्र सदनलाई जानकारी गराओस्, हाेइन भने भाेलिबाट सदन अगाडि बढ्न दिनेछैनाैं'-उहाँले भन्नुभयाे ।
