काठमाडाैं । नेकपा एमालेले काेशी प्रदेशमा पहिचानका नाममा सत्तारुढ दलकै नेता-कार्यकर्ताले एमालेमाथि आक्रमण गरेका भन्दै आपत्ति जनाउनुभएकाे छ ।
शुक्रबार बसेकाे प्रतिनिधि सभा बैठकमा समय लिएर बाेल्दै एमालेका सचिव एवं सांसद् याेगेश भट्टराईले कोशी प्रदेश नामाकरणपछि पहिचानवादी समूहले पार्टीका नेतालाई निशाना बनाएको भन्दै कडा आपत्ति जनाउनुभयाे ।
कोशी प्रदेशको नामलाई लिएर पार्टी अध्यक्ष केपी शर्मा ओली र उपनेता सुवास नेम्वाङ लगायत एमालेका शीर्ष नेताको हत्या प्रयास भएकाे भन्दै उहाँले एमाले नेतामाथि निरन्तर भइरहेका आक्रमणबारे स्पष्ट जवाफ दिन गृहमन्त्री नारायणकाजी श्रेष्ठकाे ध्यानाकर्षण गराउनुभयाे । 'कोशी प्रदेशको नाम के राख्ने त्यो कोशी प्रदेश सभाको अधिकारको कुरा हो, तर यही नाममा हाम्रो पार्टीका संसदीय दलका नेता केपी शर्मा ओली, उपनेता सुवास नेम्वाङको टोली पूर्वको विभिन्न क्षेत्रमा जाँदा झापा, इलामदेखि तेह्रथुमसम्मका सडकमा अवरोध सिर्जना गर्ने, रुखहरू ढाल्ने, ढुंगामुढा गर्ने, कालो झण्डा देखाउने र केही ठाउँमा एम्बुस समेत थापिएको थियो, त्यसको मतलब हाम्रा नेताहरूको हत्याको प्रयास समेत भएको थियो भनेर स्वाभाविक रूपमा बुझ्न सकिन्छ'- उहाँले भन्नुभयाे ।
काेशी नाममा चित्त नबुझे संवैधानिक प्रकियामा जान आग्रह गर्दै सांसद् भट्टराईले अराजकता नमच्याउन चेतावनी दिनुभयाे । उहाँले भन्नुभयाे - 'प्रदर्शनकारीकाे मृत्यु के कारणले भयाे ? पुलिसले हाे कि ? राज्यले हाे ? या अरु कारणले ? गृहमन्त्रीज्यू जवाफ चाहियाे, प्रदेशकाे नाम के राख्ने हामीसँग सराेकारकाे विषय हाेइन, कुनै पार्टीलाई चित्त बुझेकाे छैन भने वैधानिक प्रक्रियाबाट दुई तिहाइ बहुमतबाट नाम परिवर्तन गर्नुस् हामीलाई स्वीकार्य छ, ढुंगामुढा र अराजकता सृजना गरेर हुँदैन, देशलाई जातिय र साम्प्रदायिक विभाजन गर्ने भन्दा दु:खद कुरा केही छैन, याे स्वीकार्य हुँदैन ।'
सत्तापक्ष एमालेसँग भिड्न खाेजेकाे हाे भन्ने प्रश्न गर्दै उहाँले भन्नुभयाे - 'मुख्यमन्त्रीमाथि हमला हुन्छ, अरु मन्त्रीमाथि दुर्व्यवहार भएकाे छ, सरकारी कार्यालयका साइनबाेर्ड फ्याँकिएका छन्, सरकार रमिता हेरेर बसेकाे छ, सत्तारुढ घटकमध्येका केही दलका प्रतिनिधिहरु हाम्राे पार्टी अध्यक्षमाथि हातपात गर्न आए, राम रानामाथि हातपात गर्न आए, उपनेतामाथि हातपात गर्न आए, उपसभामुखमाथि हातपात गर्न आए, तपाइँलाई भिडियाे र फाेटाे देखाउला, सत्तापक्ष हामीसँग भिड्न आउन खाेज्नुभएकाे छ ?'
शान्तिपूर्ण विराेध प्रदर्शनमा विश्वास गर्ने पार्टी भएकाे भन्दै उहाँले वैधानिक प्रक्रियाबाट नाम बदले कुनै आपत्ति नरहने बताउनुभयाे । सरकारले सुरक्षा दिन नसके एमालेले आफ्नाे सुरक्षा आफैं गर्ने सांसद् भट्टराईले बताउनुभयाे । उहाँले भन्नुभयाे - 'एमालेमाथि पार्टीगत हिसाबले नेतागत हिसाबले निशाना लगाइन्छ भने, यदि गृहमन्त्रीजी तपाइँले सुरक्षा दिन सक्नुहुन्न भने एमालेकाे सुरक्षा एमालेले गर्छ, गृहमन्त्रीबाट स्पष्ट जवाफ चाहान्छाैं, स्पष्ट जवाफ आएन भने हाम्राे विराेध जारी रहन्छ ।'
याे बुद्धकाे देशमा के हुँदैछ, कसले याे हिंसा मच्याउन खाेज्दैछ भन्ने प्रश्न पनि सांसद् भट्टराईले बताउनुभयाे ।
