काठमाडाैं । उपप्रधान एवं गृहमन्त्री नारायणकाजी श्रेष्ठले काेशी प्रदेशमा पहिचानका नाममा भइरहेका आन्दाेलनप्रति सरकारकाे गम्भीर ध्यानाकर्षण भएकाे बताउनुभएकाे छ ।
शुक्रबार बसेकाे प्रतिनिधि सभा बैठकमा काेशी प्रदेशमा भइरहेका गतिविधिबारे स्पष्ट पार्दै गृहमन्त्री श्रेष्ठले त्यहाँ पहिचानवादीको आन्दोलनको नाममा केही अराजक र असंवैधानिक गतिविधिहरु भइरहेकाप्रति ध्यानाकर्षण भएकाे बताउनुभयाे ।
प्रमुख प्रतिपक्षी नेकपा एमालेले आफ्ना नेताहरूमाथि कोशीमा आक्रमण भइरहेकोमा शुक्रबार प्रतिनिधि सभामा विरोध गर्दै गृहमन्त्रीसँग जवाफ मागेको थियो ।
त्यसकाे जवाफ दिँदै उहाँले कोशी प्रदेशमा गैर शान्तिपूर्ण र अराजक गतिविधि भए राज्यले छुट नदिने बताउनुभयाे । 'संविधान कानुनलाई आफ्नाे हातमा लिने, संविधान विराेधी गतिविधि गर्ने, अराजक गतिविधि गर्ने, उदण्ड गतिविधि गर्ने, सार्वजनिक सम्पत्तिमा तथा संस्थाहरुकाे सुरक्षामा चुनाैती उत्पन्न गर्ने, सांसद्, नेता वा अरुकाे सुरक्षामा खेड उत्पन्न गर्ने र ध्वंसात्मक गतिविधि गरिने कुनैपनि क्रियाकलापलाई सरकारले छुट दिन सक्दैन'-गृहमन्त्रीले भन्नुभयाे ।
बिहीबार एमाले काेशी प्रदेश संसदीय दलका नेता लगायतमाथि भएकाे आक्रमणप्रति दु:ख व्यक्त गर्दै उहाँले त्यसमा संलग्न सबैलाई कानुनी दायरामा ल्याइने बताउनुभयाे । आक्रमणमा संलग्न रहेकाहरुलाई अनुसन्धान गरेर कारबाहीकाे दायरामा ल्याउने काम भइरहेकाे र प्रहरीलाई निर्देशन दिइसकिएकाे गृहमन्त्री श्रेष्ठले बताउनुभयाे ।
एमाले नेता र उपसभामुखलाई कार्यक्रममा जाँदा बिहीबार प्रहरीले स्कटिङ गर्दै सुरक्षा समेत दिएको पनि उहाँले बताउनुभयाे । संविधान अनुसार चल्न उहाँले सबै पक्षलाई आग्रह गर्नुभयाे । 'सबैलाई आफ्नाे विचार राख्ने स्वतन्त्रता छ, तर संविधान र लाेकतन्त्रले प्रत्याभुत गरेकाे शान्तिपूर्ण बाटाे र विधि अन्तर्गत हुनुपर्छ, त्याे अधिकारकाे रक्षा गर्न सरकार प्रतिबद्ध छ, तर आफूले ठिक ढंगले विषयवस्तुलाई पक्रन नसक्दा यही संघीयतामाथि आक्रमण गर्नेहरुलाई, संघीयता कमजाेर पार्नेहरुलाई बल पुग्न नजाओस् भने गम्भीर हुन पनि ती साथीलाई आग्रह गर्दछु'-गृहमन्त्रीले भन्नुभयाे ।
दलहरु पनि संयमित भएर चल्नुपर्ने उहाँले बताउनुभयाे । राजनीतिक ढंगले समस्या समाधानकाे पहलका लागि जुट्न गृहमन्त्री श्रेष्ठले सबैमा अपिल गर्नुभयाे ।
संविधानसम्मत ढंगले प्रदेश सभाले गरेकाे निर्णयलाई सबैले सम्मान गर्नुपर्ने भन्दै उहाँले चित्त नबुझेका कुराहरु वार्ता र संवादकाे माध्यमबाट सम्बाेधन गर्न सकिने बताउनुभयाे ।
