काठमाडौं । माओवादी केन्द्रका सांसद् जनार्दन शर्मा प्रमुख प्रतिपक्षी नेकपा एमालेका अध्यक्ष केपी शर्मा ओलीमाथि खनिनुभएकाे छ ।
शुक्रबार बसेकाे प्रतिनिधि सभा बैठकमा बजेटमाथिकाे छलफलमा बाेल्दै सांसद् शर्माले चालु आर्थिक वर्षकाे बजेटमा एमाले अध्यक्ष ओलीले पूर्वाग्राहीपूर्ण टिप्पणी गरेकाे आराेप लगाउनुभयाे ।
केपी ओलीप्रति आक्राेशित देखिएका शर्माले माओवादीको सहयोगबिना प्रधानमन्त्री बन्ने कल्पना नगर्न ओलीलाई चुनाैती समेत दिनुभयाे ।नेपालकाे राजनीतिक इतिहास माओवादीबिना अपुराे रहने दाबी समेत उहाँले गर्नुभयाे ।
माओवादी चुम्बकीय शक्ति र एमाले धातु रहेकाे दाबी गर्दै सांसद् शर्माले सदनमा तेस्राे पार्टी भएपनि राप ताप र परिवर्तनबाट आएकाे माओवादीसँग चुम्बकिय शक्ति यथावत रहेकाे दाबी गर्नुभयाे ।
'संविधान संघीयता धर्मनिरपेक्षता समावेशिता र समानुपातिक जस्ता मुद्धा माओवादीका विरासत हुन्, यसकै बलमा केपी ओलीलाई दुई तिहाइको प्रधानमन्त्री बनाउन पार्टीगत, समूहगत र व्यक्तिगत रूपमा योगदान पुराएका हैनौं र ? याद रहोस्, माओवादीको शक्तिबिना तपाइँको सिंहदरबार यात्रा कठिन छ र भइरहने छ, गत मंसिरको निर्वाचनमा तपाइँको एकल एजेण्डा अनुमोदन नभएको र शक्तिको व्यापक क्षयिकरण भएको कुरा याद रहोस्'- उहाँले भन्नुभयाे ।
चुम्बकिय शक्तिमा धातुहरूलाई आकर्षित गर्ने गुण हने र यसमा धातुहरू यसमा टाँसिने भन्दै सांसद् शर्माले माओवादीबिना एमाले अगाडि बढ्न नसक्ने दाबी गर्नुभयाे । आफूले ल्याएकाे बजेटमा समृद्ध नेपाल सुखी नेपाली बनाउने नारालाई कार्यान्वयन गर्ने कार्यक्रम राखेकाे दाबी समेत उहाँले गर्नुभयाे ।
सांसद् शर्माले आगामी आर्थिक वर्षकाे बजेटबारे भने केही बाेल्नुभएन ।
