काठमाडाैं । अर्थमन्त्री डा. प्रकाशशरण महतले विद्युतीय सवारी साधन तथा दैनिक उपभोग्य वस्तुमा कर लगाउँदा आम नागरिकलाई असर नपर्ने दाबी गर्नुभएकाे छ ।
शुक्रबार बसेकाे राष्ट्रिय सभा बैठकमा बजेटमाथिकाे छलफलमा बाेल्दै अर्थमन्त्री महतले विद्युतीय गाडी तथा प्याज, आलु र स्याउमा भ्याट लगाउँदा आमनागरिकलाई असर नपर्ने दाबी गर्नुभयाे ।
विद्युतीय सवारीमा कम क्षमताका सवारीका लागि कम दर, बढी क्षमताका लागि बढी, त्यो भन्दा पनि बढी क्षमताका गाडीलाई अझ बढी दर लगाइएको अर्थमन्त्री महतले बताउनुभयाे । विद्युतीय सवारी साधनमा करको दर हेरफेर गर्दा सूचना चुहाएको आरोप झुटो भएको दाबी समेत उहाँले गर्नुभयाे ।
'विद्युतीय गाडीमा कर वृद्धि तथा प्याज, आलु र स्याउमा भ्याट लगाउँदा आम नागरिकलाई समस्या परेको भाष्य स्थापित गर्न खोजिएको छ, त्यो भ्रममा नपर्नुहोला, विद्युतीय गाडीमा कर तर्कयुक्त ढंगले कायम गरेका हौं, बढाएको होइन, कम क्षमताका गाडीका लागि कम दर, बढी क्षमताका लागि बढी, त्यो भन्दा पनि बढी क्षमताका गाडीलाई अझ बढी दर लगाइएको हो'- अर्थमन्त्रीकाे दाबी थियाे ।
वैज्ञानिक कर प्रणालीका कारण राजस्वको दायरा फराकिलो हुने विश्वास समेत उहाँले व्यक्त गर्नुभयाे । अर्थमन्त्री महतले भ्याटको दर घट्दै जाने र छुट हरेक वर्ष बढ्दै जाने प्रवृतिलाई हटाइएको र राजस्वका दर वैज्ञानिक रुपमा प्रस्ताव गरिएको दाबी गर्नुभयाे ।
अर्थतन्त्रलाई सहज बनाउनका लागि बजेटले चालेको कदमका विरुद्ध केही स्वार्थ समूहहरु विरोधमा उत्रेको उहाँकाे गुनासाे थियाे । करको दायराले स्वदेशमा नै उत्पादन हुने प्याज आलु जस्तो वस्तुलाई कुनै असर नपर्ने र आयातलाई निरुत्साहन गर्नका लागि करको प्रस्ताव ल्याइएको अर्थमन्त्रीले दाबी गर्नुभयाे ।
उहाँले ६ प्रतिशतको आर्थिक बृद्धिदरको लक्ष्य प्रभाकारी खर्च , नीजि क्षेत्रको सहि तवरले परिचालन भए सम्भव रहेकाले महत्वकांक्षी नभएको दावी गर्नुभयो । संसदीय क्षेत्र पूर्वाधार कार्यक्रममाथि अविश्वास गर्नुपर्ने कुनै कारण नभएको समेत अर्थमन्त्री महतले बताउनुभयाे । स्थानीय उद्योग व्यवसायलाई प्रवर्द्धन गर्नका लागि बजेटमार्फत आवश्यक सहजीकरण गरिएको उहाँकाे दाबी थियाे ।
पूँजीगत खर्च गर्न नसक्नु चुनौतीपूर्ण बन्दै गएकाे पनि उहाँले बताउनुभयाे ।
