कठमाडौं । प्रतिनिधि सभा सदस्य गगन थापाले साना व्यापारीहरूको अहिले उठीबासको अवस्था भएको बताउनुभएको छ ।
आइतबार प्रतिनिधि सभा बैठकमा बोल्दै थापाले ठुला व्यापारीमा पनि चरम निराशा देखिएको बताउनुभयो । यी कुरालाई सरकारले ल्याएको बजेटले कसरी र कति काम गर्ने हो भन्ने विषय अहिलेको चासोको विषय रहेको थापाले बताउनुभयो । न्यून आर्थिक वृद्धि, बेरोजगारी र मूल्य वृद्धिलाई नियन्त्रण गर्न सकिएन भने डरलाग्दो अवस्था सिर्जना हुने थापाको भनाइ छ ।
थापाले अहिले प्रस्ताव गरिएको बजेटको आकार अवास्तविक भएको बताउनुभयो । बजेट अवास्तविक छ भन्ने कुरा अर्थमन्त्रीले पनि मनमनै स्वीकारेको हुनु पर्ने उहाँले बताउनुभयो । लेखि सकिएकाले त्यसको डिफेण्ड गर्नु स्वाभाविक भए पनि यथार्थलाई स्विकारेर अघि बढ्यो भने कार्यान्वयनमा जान सहज हुने र त्यस अनुसार उपलब्धि पनि आउने उहाँको भनाइ छ । ‘अवास्तविक बजेटलाई डिफेन्स गर्दा गर्दै छोटो सिरक जस्तो, सिरक माथि तान्यो तल पुग्दैन, तल तान्यो माथि पुग्दैन, त्यसैले यसको वास्तविकतालाई स्विकार्नु पर्छ’, उहाँले भन्नुभयो ।
बजेटको अनुमान गलत छ भनेर अर्थ सचिवले नै भनिसकेको अवस्थामा यो अनुमानलाई कसरी परिणाममा ल्याउने भन्ने विषयमा सोच्नु पर्ने उहाँको भनाइ छ । ठुलठुला आयोजनाको कामलाई कसरी अघि बढाउने भन्ने स्पष्ट दृष्टिकोण हुन आवश्यक रहेको उहाँले बताउनुभयो । बजेटमा राखिएका बुँदाको एक पटक पुनः अर्थ मन्त्रालयलाई अध्ययन गर्न उहाँले सुझाव दिनुभयो ।
