काठमाडौं । पशुपति क्षेत्र विकास कोषका सदस्यसचिव मिलनकुमार थापाले पशुपतिमा सुनको जलहरी लगाउँदा सुन गायब गरेको भए आफू जस्तोसुकै कारबाही भोग्न पनि तयार रहेको बताउनुभएकाे छ ।
मंगलबार सिंहदरबारमा बसेको राष्ट्रिय सभाको राष्ट्रिय सरोकार तथा समन्वय समितिको बैठकमा सदस्यसचिव थापाले आफूलाई बिना आधारमा सुन हिनामिना गरेको आरोप लगाइएकाे बताउनुभयाे । सुन चोरी गरेको प्रमाणित भए जस्तोसुकै कारबाही भोग्न पनि आफू तयार रहेको उहाँले बताउनुभयाे ।
संसदीय समितिमा निकै भावुक भएर प्रस्तुत भएका सदस्य सचिव थापाले यस विषयमा न्याय माग्न आत्महत्या गर्नुपर्ने हो ? भन्दै प्रश्न गर्नुभयाे । राष्ट्र बैंकसँगको सम्झौता अनुसार १०३ केजी सुन ल्याएको र तत्कालीन प्रधानमन्त्री केपी ओली र तत्कालीन राष्ट्रपति विद्यादेवी भण्डारीको निर्देशनमा शिवरात्रीलाई लक्षित गरी छिटो काम सकेकाे उहाँले बताउनुभयाे ।
पशुपतिमा सुनको जलहरी लगाउँदा २४ घण्टा नेपाली सेना तैनाथ गरिएको सदस्यसचिव थापाले बताउनुभयाे । अदालतबाट सुनको जलहरी हाल्न हुँदैन भनेर प्रदेश सांसद् नरोतम बैद्यले स्टे अर्डर ल्याएको बेला ९६ किलो ८२२ ग्राम सुन तयार भएको र १० किलो सुन जलहरीका लागि तयारी नभएको हुँदा माइनुटमा मात्रै नलेखिएको र साे १० किलो पशुपतिनाथ मन्दिरमै रहेको उहाँले बताउनुभयाे ।
१० किलो सुनका कारण आफ्नो बेइज्जत भएको भन्दै सदस्यसचिव थापाले सुन जोख्दा नपुगे मृत्युदण्ड भोग्न पनि तयार रहेको बताउनुभयाे । 'जाेख्दाखेरी थाहा हुन्छ सुन हाल्याे यदि १० केजी सुन पुगेन भने मलाई मृत्युदण्ड दिँदा हुन्छ, म मृत्युदण्ड लिन तयार छु, आज मेरो गाउँभरि बेइज्जत भयो, मेरो दुई जना सन्तान छन्, मैले सुन चाेरकाे बिल्ला भिर्ने (गहभरी आँशु पार्दै) अन्यथा नलिनु होला, म कमजोर होइन, तर राज्यले कमजोर बनायो नि त'- उहाँले भन्नुभयाे ।
आयोगले छानबिन गर्न नपर्ने ? भन्ने प्रश्न गर्दै सदस्यसचिव थापाले भन्नुभयाे - 'पटक-पटक हामीलाई मुद्दा चलाउँछु भनेको छ, जोखेर मुद्दा चलाऔं न, यो च्यालेञ्ज हो, पुगेन भने फाँसी देऔ भनेको ।'
उहाँले यथार्थ नबुझी आफूलाई सुन चोर भनिएकाे आपत्ति जनाउँदै उहाँले गल्ती गरेकाे भए छानबिन गरेर सजाय दिन तर बद्नाम नगर्न आग्रह गर्नुभयाे । यस प्रकरणमा आफू निकै पीडित भएको र बाेल्ने ठाउँ पनि कतै नपाएकाे भन्दै सदस्यसचिव थापाले संसदीय समितिमा कुरा राख्न पाएकाे खुशी लागेकाे बताउनुभयाे ।
ल्याबमा गएर त्याे जलहरीकाे परीक्षण गर्न चुनाैती दिँदै उहाँले काम गरेकै भरमा बद्नामी नगर्न आग्रह गर्नुभयाे । दाेषी प्रमाणित भए कारबाही भाेग्न तयार रहेकाे भन्दै सदस्यसचिव थापाले पशुपतिमा आएर सुन चाेरेर खान नपर्ने बताउनुभयाे । धनी र गरिब मर्दाखेरी एउटै कात्रो ओडेर जाने ठाउँ पशुपति भएकाे बताउँदै उहाँले भन्नुभयाे - 'महलमा बसेपनि छाप्रोमा बसेपनि काल त एउटै हो नि ।'
समितिले राष्ट्रिय गौरवको आयोजना पशुपति क्षेत्र विकास कोषको सम्पत्ति र यसको उपयोग सम्बन्धमा कोषका पदाधिकारीसँग छलफल गरेको थियो ।
