काठमाडौं । प्रतिनिधि सभा सदस्य प्रदीप पौडेलले अहिलेको आवश्यकता विकासका ठुला ठुला योजना भन्दा पनि सुशासनको भएको बताउनुभएको छ ।
बिहीबार प्रतिनिधि सभा बैठकमा बोल्दै पौडेलले विकासका ठुला ठुला योजना भन्दा पनि यति बेला सुशासन चाहिएको बताउनुभयो । भ्रष्टाचार अन्त्य गर्ने प्रक्रिया भित्र जे जस्ता समस्या छन् तिनलाई हल गर्नुपर्ने उहाँले बताउनुभयो । ‘सुशासनको प्रत्याभूति मात्रै गराउन सक्ने हो भने नेपालमा धेरै ठुलो उपलब्धि हुनसक्छ’, पौडेलले भन्नुभयो ।
सरकारको बजेट तथा कार्यक्रम भित्र सुशासनको प्रावधान नआएको भन्दै पौडेलले आलोचना गर्नुभयो । पुँजी लगानी नगरी गर्न सकिने काम धेरै भए पनि ती कार्यक्रम बजेट तथा कार्यक्रममा नपरेको उहाँले बताउनुभयो । ‘हाम्रो समस्या खालि बजेट लगानीको मात्र होइन, हाम्रो समस्या सुशासनको पनि हो’, उहाँले भन्नुभयो ।
वन, महिला तथा बालबालिका मन्त्रालयमा सुशासनमा केन्द्रित रहेर कार्यक्रम ल्याउनु पर्नेमा त्यो नभएको उहाँले बताउनुभयो । बजेट तथा कार्यक्रम ल्याउँदा धेरै कुरामा त्रुटि भएको उहाँको भनाइ छ ।
बजेट फेरी पनि पुरानै तरिकाले आएको भन्दै उहाँले आलोचना गर्नुभयो । त्यसै गरी संसद्मा हुने बजेट छलफलको विषय माथि पनि प्रश्न भएको उहाँले बताउनुभयो । नीति, कार्यक्रम र बजेट आउनु अगाडि नै सो विषयमा छलफल हुनुपर्ने उहाँले माग गर्नुभयो । त्यसो गर्यो भने सरकारले सांसदले बोलेका कुरा सम्बोधन गर्न सक्ने उहाँले बताउनुभयो । नीति, कार्यक्रम र बजेट आए पछि गरिने छलफलको कुनै अर्थ नहुने उहाँले प्रष्ट पार्नुभयो । पछिको छलफलले कुनै निष्कर्ष ननिकाल्ने उहाँको भनाइ छ ।
सरकारको प्राथमिकताको आधारमा बजेटको मापदण्ड निर्धारण हुनु पर्नेमा उहाँले जोड दिनुभयो । पहुँचका आधार बजेट कनिका जस्तै छरिएको भन्दै उहाँले आलोचना गर्नुभयो ।
