काठमाडौं । नेकपा एमालेका सांसद् सूर्य थापाले बालुवाटारमा गठबन्धनका ठालुहरुको बैठक बसेर बजेट संशोधन गर्ने कुरा स्वीकार्य नहुने चेतावनी दिनुभएकाे छ ।
शुक्रबार बसेकाे प्रतिनिधि सभा बैठकमा उद्योग, वाणिज्य तथा आपूर्ति, भूमि व्यवस्था, सहकारी तथा गरिबी निवारण र भौतिक पूर्वाधार तथा यातायात मन्त्रालयको विनियोजन शीर्षकमाथिको छलफलमा भाग लिँदै उहाँले गठबन्धनका नाममा संविधान विपरीत गतिविधि नगर्न चेतावनी दिनुभयाे ।
बजेटमा छलफल भएर अर्थमन्त्री डा. प्रकाशरण महतले स्पष्टिकरण दिइसकेपछि बालुवाटारमा सत्ता गठबन्धनकाे बैठक बसेर बजेट संशाेधन गर्ने भन्नु आपत्तिजनक रहेकाे सांसद् थापाले बताउनुभयाे । बालुवाटारमा बसेर बजेट संशाेधन गर्ने हाे भन्ने संसद्मा छलफल गर्नुकाे औचित्य नहुने उहाँले बताउनुभयाे । 'अर्थमन्त्रीले जवाफ दिनुभयाे, प्रश्नाेत्तर भयाे, हाम्राे प्रश्नकाे उत्तर पनि दिनुभयाे, भाेलिपल्ट बालुवाटारमा गठबन्धनकाे नाममा बैठक गरेर अनि बजेट संशाेधन गरेर असन्तुष्टि संशाेधन गर्नेरे ? कसकसका असन्तुष्टि संशाेधन गर्ने ? बालुवाटारमा ठालुहरुले निर्णय गरेर बजेट संशाेधन हुन्छ भने संसद्मा याे नाैटंकी किन गर्नुपर्याे ?'- थापाकाे प्रश्न छ ।
अर्थमन्त्रीले जवाफ दिइसकेपछि बालुवाटारमा गठबन्धनका ठालुहरुकाे बैठक बसेर गर्न खाेजिएकाे के हाे ? भन्ने प्रश्न गर्दै सांसद् थापाले भन्नुभयाे - 'संविधान, कानुन, प्रक्रिया र पद्धतिले भन्छ कि भन्दैन, चपाइँ कमा फुलिष्टब केही संशाेधन गर्न तयार हुनुहुन्न सांसद्हरुका प्रश्नमा, तर बालुवाटारमा बैठक बसेर संशाेधन गर्ने भनेर समाचार सार्वजनिक हुन्छ, के के विषयमा संशाेधन हाे, अर्थमन्त्रीज्यूले सहमति जनाउनुभएकाे विषय हाे कि हाेइन ? गठबन्धनका नाममा संविधान विपरीत अभ्यास गर्न पाइन्छ कि पाइँदैन ?'
बजेटमा पहुँचवाला सत्तापक्षीय नेताका नाममा कार्यक्रम परेका भन्दै उहाँले बजेट शीर्षक नछुट्याइ एकमुष्ठ रुपमा राख्ने र संसद्लाई छलेर संसद्काे आँखामा छाराे हालेर आफ्नाे स्वार्थका याेजनामा बजेट पठाउने सरकारकाे रवैया खेदजनक रहेकाे बताउनुभयाे ।
कुलिनतन्त्रलाई पनि बिर्साउने अभ्यास भइरहेकाे भन्दै सांसद् थापाले ठालुतन्त्र मुर्दावाद भन्ने नारा समेत लगाउनुभयाे । बजेटका नाममा ठालुतन्त्रकाे अभ्यास भइरहेकेा भन्दै उहाँले विनियाेजन सच्चाउन सरकारसँग माग गर्नुभयाे ।
भौतिक पूर्वाधार तथा यातायात मन्त्रालयका लागि अघिल्लो वर्षकाे बजेटभन्दा अहिले प्रस्तुत बजेटमा रकम घटाइएको र त्यसमा पनि पहुँचका आधारमा बजेट छुट्याइएकाे भन्दै उहाँले आपत्ति जनाउनुभयाे । यसले आम नागरिकको पूर्वाधार विकासको अपेक्षालाई समेट्न नसकेको सांसद् थापाले बताउनुभयाे ।
मन्त्रालयले देशभरका कामको जिम्मा लिने तर न्यून बजेट विनियोजन गरेर काम अलपत्र पार्ने हुँदा जनताको अपेक्षाअनुसार काम गर्न नसकेको गुनासो सुनिँदै आइएकाेमा यसपटक झन् बजेटमा उपेक्षा गरिएकाे उहाँले बताउनुभयाे । आफ्नै हातमा डाडुपन्यूँ भएका पहुँचवालाले मात्रै बजेट पाएका भन्दै सांसद् थापाले पक्षपाती बजेट स्वीकार्य नहुने बताउनुभयाे ।
