काठमाडौं । प्रतिनिधि सभा सदस्य योगेश भट्टराईले पूर्वी पहाडका जिल्लामा वर्षाले पुर्याएको क्षतिको बारेमा सरकारको ध्यानाकर्षण गराउनुभएको छ ।
आइतबार प्रतिनिधि सभा बैठकमा बोल्दै भट्टराईले ताप्लेजुङ, पाँचथर, सङ्खुवासभा, तेह्रथुम लगायतका जिल्लामा ठुलो जनधनको क्षति भएको बताउनुभयो ।
बाढी पहिरोको कारण केही मानिस बेपत्ता भएका र धेरै मानिसहरू घरबार विहीन भएका भट्टराईले जानकारी दिनुभयो । बाढी पहिरोको कारण दर्जनौँ घर जोखिममा परेका उहाँले बताउनुभयो । तीन दिनदेखि ओडारमा बसेका एक आमा छोरा अहिले सम्पर्कविहीन भएका कारण उनीहरूको समेत अवस्था अज्ञात रहेको उहाँले जानकारी दिनुभयो ।
तमोर नदीमा आएको बाढीका कारण ताप्लेजुङको दोस्रो ठुलो बजार जोखिममा परेको उहाँले बताउनुभयो । सडक र पुल बिग्रँदा ताप्लेजुङको सडक सम्बन्ध टुटेको, विद्युतको पोल बगाएको, टेलिफोन अवरुद्ध भएको, दर्जनौँ झोलुङ्गे पुल बगाएको, मोटरेबल पुल भत्काएको कारण पूर्वी पहाडमा ठुलो मानवीय र भौतिक क्षति भएको उहाँले जानकारी दिनुभयो ।
भट्टराईले विपत्को सम्पूर्ण अवस्थाको जानकारी सरकारले दिनु पर्ने माग गर्नुभयो । विपत्को अवस्थाको जानकारी गृह मन्त्रीले र भौतिक पूर्वाधारको क्षतिको अवस्थाको भौतिक पूर्वाधार मन्त्रीले संसद्मा जानकारी दिनु पर्ने उहाँले माग गर्नुभयो ।
भट्टराईले राहत र उद्धारमा तीव्रता दिन सरकारसँग माग गर्नुभयो । क्षति भएका पूर्वाधार निर्माणको काम पनि तत्काल सुरु गरी आवागमनलाई सहज बनाउनु पर्ने उहाँले बताउनुभयो ।
यसै गरी प्रतिनिधि सभा सदस्य रामकुमार राईले पनि पूर्वमा भएको क्षति बारे जानकारी गराउँदै राहत, उद्धार र पुनर्स्थापनाको माग गर्नुभयो । उहाँले ठुलो क्षति भएकोले त्यसमा सरकारको ध्यानाकर्षण गराउनुभयो ।
प्रतिनिधि सभा सदस्य दीपक खड्काले सङ्खुवासभा, तेह्रथुम, पाँचथर, ताप्लेजुङ लगायतका जिल्लामा ठुलो क्षति भएको भन्दै सरकाको ध्यानाकर्षण गराउनुभयो । अहिले पनि मानिसहरू हराइरहेकाले उद्धार कार्यलाई प्रभावकारी बनाउन माग गर्नुभयो ।
