काठमाडाैं । नेकपा एमालेका सांसद् गाेकुल बाँस्काेटाले सरकारले बजेट निर्माणमा लापरबाही गरेकाे भन्दै आपत्ति जनाउनुभएकाे छ ।
मंगलबार बसेकाे प्रतिनिधि सभा बैठकमा 'विनियोजन विधेयक, २०८० अन्तर्गत सहरी विकास मन्त्रालय शीर्षकको रकम घटाइ एक रुपैयाँ कायम गरियोस्' भनी खर्च कटौती प्रस्ताव पेस गर्दै उहाँले काभ्रेपलाञ्चाेकमा नभएका ठाउँमा पनि सरकारले बजेट छुट्याइएकाे बताउनुभयाे ।
काभ्रेकाे पनाैती नगरपालिकामा हुँदै नभएका वडा र दुई गाउँपालिकाका लागि बजेट छुट्याइएकाे तर आफ्नाे क्षेत्रमा बजेट नछुट्याइएकाे भन्दै उहाँले आपत्ति जनाउनुभयाे ।
हुँदै नभएका वडा भेट्ने कस्ताे चस्मा लगाएकाे भन्दै सांसद् बाँस्काेटाले यस्ताे चश्मा कसले किनिदियाे भन्दै अर्थमन्त्री डा. प्रकाशशरण महतप्रति ब्यंग्य गर्नुभयाे । उहाँले भन्नुभयाे - 'तपाइँहरुलाई चुराेटकाे बट्टाकाे चिर्कटाेमा लेखेर कसैले दियाे, अर्थ मन्त्रालयले ठाउँ न ठहर बुझ न सुझ त्यहाँ राख्दियाे, पनौतीमा १२ वटा वडा छन्, जुन जिल्लाबाट म प्रतिनिधित्व गर्छु, पनौती नगरपालिकामा १३ नम्बर वडा कहाँ पर्छ ? मलाई थाहा छैन अर्थमन्त्रीज्यू, शहरी विकास मन्त्रीज्यू, मलाई थाहा छैन, १४ नम्बर वडा कहाँ पर्छ ? १५ नम्बर वडा कहाँ पर्छ ? दुईटा गाउँपालिका जहाँ बजेट छुट्याउनुभएको छ काभ्रेमा पर्दैन, बजेट गज्जबले छुट्याउनुभएको छ, कसले दियो त्याे चिर्कटो ? गज्जब लाग्यो, त्यसो हुँदा मैले सोध्नुपर्ने भयो, प्रकाश सपुतलाई सम्झेर यो आँखै खाने चस्मा तिमीलाई कसले किन्दियो ?, तिरमिरायाे ।'
याे सरकारसँग नागरिकहरु आशावादी हुन नसक्ने भन्दै सांसद् बास्काेटाले याे सरकारसँग कुनै भिजन, मिसन, उद्देश्य केही पनि नभएकाे बताउनुभयाे ।
बजेटमा पूर्वाग्रह राखिएकाे भन्दै उहाँले नगरकाेट-हिगुवापाटी गैह्री बिसाैना सडक निर्माणका लागि सरकारले बजेट नछुट्याएकाे बताउनुभयाे । उहाँले भन्नुभयाे - 'पीच हुन ठिक्क पर्याे नापजाँच गरेर पठाउनुस्, हिजाे भाैतिकबाट शहरीमा ल्याउनुभयाे, यतापट्टि १० लाख पैसा हाल्नुभयाे, १९ किलाेमिटर छ, म साेध्छु मेराे झाेंकले मैले त्यहाँबाट प्रतिनिधित्व गर्छु भनेर, त्यहाँका कांग्रेस, माओवादी, समाजवादी, रास्वपाका निम्ति अर्काे बाटाे बनाउँछ याे सरकारले ? कि त्यही बाटाे हिँड्ने हाे ? अचम्मकाे पूर्वाग्रह देखियाे ।'
यही सदनमा ब्रिफकेस फुटाएकाे देखेकाे भन्दै उहाँले कालाे झण्डा लिएर उभिन नपराेस् भन्दै चेतावनी दिनुभयाे । विकास जनताकाे अधिकारकाे प्रश्न भएकाे भन्दै सांसद् बाँस्काेटाले अन्याय नगर्न सरकारलाई चेतावनी दिनुभयाे । यही हालतले जाने हाे भने गठबन्धनले अर्काेचाेटीकाे चुनावमा रामधुलाइ पाउने समेत उहाँले बताउनुभयाे ।
शहरी क्षेत्रमा आवश्यक पूर्वाधार निर्माणका लागि सरकारले पर्याप्त बजेट छुट्याउन नसकेको पनि उहाँले बताउनुभयाे ।
