काठमाडाैं । राष्ट्रिय स्वतन्त्र पार्टी (रास्वपा) का डा. सांसद् डा. स्वर्णिम वाग्लेले अथाह सम्भावना भएका आईटी लगायत क्षेत्रलाई बजेटले बेवास्ता गरेकाे बताउनुभएकाे छ ।
मंगलबार बसेकाे प्रतिनिधि सभा बैठकमा 'विनियोजन विधेयक, २०८० अन्तर्गत अर्थ मन्त्रालय शीर्षकको खर्च रकमलाई घटाई एक कायम गरियोस्' भन्ने प्रस्ताव पेस गर्दै उहाँले बजेटमा आर्थिक सभावना भएका क्षेत्रमा उल्लेख्य कदम चाल्ने याेजना नसमेटिएकाे बताउनुभयाे ।
उहाँले भन्नुभयाे - 'अथाह आर्थिक सम्भावना भएका क्षेत्रहरुमा उल्लेख्य कदम चालिएकाे छैन, म संसद् हुनुअघि अवैतनिक अध्यक्ष रहेकाे थिंक ट्यांककाे मातहतमा एउटा सर्भे गर्याैं, निर्यातजन्य आइटी क्षेत्रमा कति छन् त नेपाली भनेर हेर्याैं, यसमा रुपान्तकारी सम्भावना देख्याैं ।'
आर्थिक सुधारको नेतृत्व गर्न आवश्यक तयारी नभएको भन्दै सांसद् वाग्लेले आर्थिक क्षेत्रमा प्रक्रियागत बेमेल रहेकाले यसलाई सुधार गर्न आवश्यक रहेको बताउनुभयाे । बजेटका सिद्धान्त र प्राथमिकतामा तथा नीति तथा कार्यक्रममा उल्लेख भएका कार्यक्रम विनियोजन विधेयकसँग नमिलेको उहाँले बताउनुभयाे ।
खर्च कटौती पेस गर्नुमा मुख्य तीन कारण रहेकाे बताउँदै सांसद् वाग्लेले भन्नुभयाे - 'आर्थिक सुधारको नेतृत्व गर्न आवश्यक संस्थागत अभिमुखीकरण र तयारी नभएको, अथाह आर्थिक सम्भावना भएका क्षेत्रमा उल्लेख्य कदम नचालिएकामा र आर्थिक सुशासन तथा स्वच्छ नियमनको जगमा गतिशील र प्रतिस्पर्धात्मक अर्थतन्त्र बनाउन विश्वसनीय जग नहालिएका कारण यो बजेटसँग मेरो विमति छ, यसकारण खर्च कटौतीको प्रस्ताव गर्दछु ।'
उहाँले आर्थिक सुशासन तथा स्वच्छ नियमनको जगमा गतिशील र प्रतिस्पर्धात्मक अर्थतन्त्र बनाउन विश्वसनीय आधार नभएको बताउनुभयाे ।सुरक्षा निकाय र सरकारी कर्मचारीको आकार घटाएर खर्च कटौतीमा लाग्नुपर्ने तथा चालु खर्चका ठूला हिस्सा रहेका ठाउँमा खर्च कटौतीका लागि सबै राजनीतिक दलले राष्ट्रिय सहमति जुटाउनुपर्ने सांसद् वाग्लेले बताउनुभयो ।
