काठमाडाैं । नेकपा एमालेका सचिव एवं सांसद् योगेशकुमार भट्टराईले उपप्राध्यापक प्रेम चलाउनेमाथि आक्रमण गर्ने नेविसंघका विद्यार्थीविरुद्ध लगाइएको मुद्दा फिर्ता लिने निर्णय तत्काल खारेज गर्न सरकारसँग माग गर्नुभएकाे छ ।
बुधबार बसेकाे प्रतिनिधि सभा बैठकमा कृषि तथा पशुपक्षी विकास, शिक्षा, विज्ञान तथा प्रविधि, कानुन, न्याय तथा संसदीय मामिला र युवा तथा खेलकुद मन्त्रालयको विनियोजन शीर्षकमाथिको छलफलमा भाग लिँदै सांसद् भट्टराईले साे माग गर्नुभएकाे हाे । यति गम्भीर विषयमा सडक र सदनमा चाैतर्फी विराेध भएपछि सरकारले मुद्दा फिर्ता लिने निर्णय खारेज गर्ला भन्ने अपेक्षा गरिएपनि त्यसाे हुन नसकेकाे उहाँले बताउनुभयाे ।
सदाचारको पक्षमा सधैं उभिने निर्णयमा कसरी हस्ताक्षर गर्न सक्नुभयो ? भन्दै सांसद् भट्टराईले कानुन, न्याय तथा संसदीय मामिलामन्त्री धनराज गुरुङलाई प्रश्न गर्नुभयाे । उहाँले भन्नुभयाे - 'म भन्दा सिनियर विद्यार्थी नेता हुनुहुन्थ्याे, उहाँलाई मैले धेरै पहिले देखि चिन्थेँ, भाषण सुन्थेँ, सदाचारको पक्षमा र भ्रष्टाचारकाे विरुद्धमा भाषण गर्नुहुन्थ्याे, कानुनमन्त्री हुनुभयाे हामीले खुशी व्यक्त गर्याैं बधाई दियाैं, तर म असाध्यै दुखी भएँकी उहाँकै हातले ती अपराधीहरुकाे मुद्दा फिर्ता लिने काम भयाे ।'
ज्यान मार्ने उद्याेगसम्बन्धी मुद्दा फिर्ता लिएर सरकारले दण्डहिनतालाई प्रश्रय दिएकाे भन्दा सांसद् भट्टराईले याे मुद्दा फिर्ता लिन कानुनमन्त्री गुरुङलाई अनुराेध गर्नुभयाे । उहाँले भन्नुभयाे - 'प्लिज यो निर्णय फिर्ता लिनुस्, नेपाली कांग्रेस, नेकपा एमाले जस्ता ठूला राजनीतिक दलहरूले नै यस्ता बेथिति र दण्डहीनताको स्थिति सृजना गर्ने हो भने यो देश कसले बनाउँछ ? तपाइँ-हामी नै त्यसो गर्ने हो भने यो देश कसले बनाउँछ ?'
०७७ असाेज २० गते चलाउनेमाथि गम्भीर सांघातिक हमला भएकाे थियाे ।
