काठमाडाैं । प्रधानमन्त्री पुष्पकमल दाहाल प्रचण्डले शुक्रबार प्रतिनिधि सभामा सांसद्हरुसँग प्रश्नाेत्तर गर्नुभएकाे छ ।
प्रश्नोत्तरका क्रममा प्रधानमन्त्री प्रचण्डले कति सांसद्लाई चिन्नुभएन भने सांसद्ले साेधेकाे प्रश्न पनि बिर्सिनुभयाे । दुई जना सांसद्को नाम र प्रश्न बिर्सेपछि प्रधानमन्त्री प्रचण्डले सभामुख देवराज घिमिरेसँग सहयोग माग्नुभएकाे थियाे । आफ्नो तयारीमा कमजोरी रहेको स्वीकार्दै उहाँले माफी समेत माग्नुभयाे ।
प्रश्नोत्तरका क्रममा सांसद् अञ्जनी श्रेष्ठले प्रश्न पनि गर्नुभयाे । लगत्तै प्रधानमन्त्रीले उहाँको नाम चिन्न नसकेर अल्मलिनुभयाे अनि सभामुखको घिमिरेको सहयोग माग्नुभयाे र भन्नुभयाे - 'अहिले भर्खरै बोल्ने माननीयको मैले नाम थाहा पाउन पर्ने भयो ।' सभामुखले सांसद्को नाम भनिदिएपछि प्रधानमन्त्रीले प्रश्नको जवाफ दिनुभयाे ।
अर्की सांसद् अम्बिका बस्नेतको त प्रधानमन्त्री प्रचण्डले नाम र प्रश्नै दुबै बिर्सिनुभयाे । उहाँले नाम भनिदिन सभामुख घिमिरेसँग आग्रह गर्नुभयाे ।सभामुखले नाम बताएपछि लिखित उत्तरहरुको ठेली हेर्दै अल्मलिनुभयाे र फेरि प्रश्न दोहोर्याउन आग्रह गर्नुभयाे - 'मेरो तयारीमा केही कमजोरी रहेको देखियो, फेरि प्रश्न राख्न आग्रह गर्दछु ।' प्रधानमन्त्रीकाे आग्रहपछि अम्बिकाले हास्दै पुन प्रश्न राख्नुभयाे ।
प्रधानमन्त्रीसँगकाे प्रश्नाेत्तरमा प्रश्न साेध्न पाइने तर स्पष्टिकरण साेध्न नपाइने प्रावधान छ । प्रश्नहरु लिखित रुपमा पहिले नै बुझाउनुपर्ने र प्रश्नाेत्तरकाे दिन साेही प्रश्न मात्र प्रधानमन्त्रीलाई साेध्न पाइने प्रावधान पनि छ ।
