काठमाडाैं । नेकपा एमालेका सचिव तथा सांसद् योगेश भट्टराईले नेपाल वायु सेवा निगमा अनावश्यक कर्मचारी भर्ना गरिएको भन्दै आपत्ति जनाउनुभएकाे छ ।
शुक्रबार बसेकाे प्रतिनिधि सभा बैठकमा संस्कृति, पर्यटन तथा नागरिक उडड्यन मन्त्रालय अन्तर्गतको विनियोजित बजेटमा छलफलका क्रममा खर्च कटौतीको प्रस्ताव पेस गर्दै सांसद् भट्टराईले घाटामा गएकाे निगममा अनावश्यक कर्मचारी भर्ना गर्नु भनेकाे आमाकाे रगत खानु जस्तै भएकाे टिप्पणी गर्नुभयाे ।
केपी शर्मा ओली नेतृत्वकाे सरकारले आफ्नाे कार्यकालभर निगममा एक जना पनि कर्मचारी भर्ना नगरेकाे भन्दै उहाँले एमालेले सरकार छाड्नासाथ निगममा अनावश्यक कर्मचारी भर्ना गरिएकाे बताउनुभयाे । ०७४ सालमा केपी ओली प्रधानमन्त्री नियुक्त भएपछि ०७७ साल फागुन ५ गतेसम्म एक जना पनि कर्मचारी भर्ती नभएका सांसद् भट्टराई प्रष्ट पार्नुभयाे । उहाँले भन्नुभयाे - 'अहिले सयाैं कर्मचारी वायुसेवा निगममा भर्ती भएका छन्, निगमलाई साेमालियाकी आमा जस्ताे बनाइएकाे छ, जुन आमाकाे दूध आउँदा उसकाे दूध चुसे जस्तै, नेपाल वायु सेवा निगममा अनावश्यक कर्मचारी भर्ना गर्नु भनेकाे आमाकाे रगत चुसेजस्तै हाे, आमाकाे रगत खानु जस्तै हाे, म त्यसकाे निन्दा गर्छु ।'
अनावश्यक कर्मचारी भर्नाले नेपाल वायु सेवा निगम हिमाल सिमेन्ट कारखाना जस्तो अवस्थामा पुगेकाे समेत सांसद् भट्टराईले बताउनुभयाे ।उहाँले भन्नुभयाे - 'नेपाल वायु सेवा निगम अहिले एक किसिमले हिमाल सिमेन्ट कारखाना जस्तो अवस्थामा पुगिरहेको छ, हिमाल सिमेन्ट कारखाना अहिले बन्द भयो, त्यहाँका कर्मचारीहरु अहिलेपनि फाटेको कपडा, फाटेको चप्पल लगाएर तलब माग्दै हिँडिरहनुभएको छ, यदि याे वायुसेवा निगमलाई संरचनागत हिसाबले सुधार नगर्ने हाे भने त्यसकाे हालत यही हुन्छ ।'
एमाले सरकारले सर्वसाधारणले पनि सेयर पाउनने गरी वायु सेवा निगमलाई पब्लिक कम्पनीमा लैजानुपर्छ भन्ने निष्कर्षसाथ प्रक्रिया अगाडि बढाएकाे स्मरण गर्दै उहाँले यसलाई पब्लिक कम्पनीमा लैजानुपर्ने बताउनुभयाे । वायु सेवा निगमकाे संरचनागत सुधार बाहेक अर्काे कुनै उपाय नभएकाे सांसद् भट्टराईकाे भनाइ थियाे ।
नागरिक उड्डयन प्राधिकरणले ग्राउण्ड ह्यान्डेलिङबाट केही पैसा पाउने भन्दै उहाँले निगमकाे आम्दानीको स्रोत भनेकै ग्राउण्ड ह्यान्डेलिङ भएकाे बताउनुभयाे । निगमलाई उडानबाट नाफा नभएकाे पनि उहाँले बताउनुभयाे ।
संस्कृति, पर्यटन तथा नागरिक उडड्यन मन्त्री सुदन किरातीले निगमकाे नाफाको विषयमा गलत तथ्यांक प्रस्तुत गरेर भ्रम छरेकाे बताउनुभयाे ।चाइनिज जहाका कारण अर्बाैं नाेक्सानी भएकाे भन्दै उहाँले बिग्रेका जहाजकाे व्यवस्थापनकाे कुनै याेजना नल्याइएकाे बताउनुभयाे । सांसद् भट्टराईले भन्नुभयाे - 'मन्त्रीज्यूले ४ अर्ब नाफा भएकाे भन्नुभएकाे छ, साँवा र ब्याज गरेर ५० अर्ब नाघमिसक्याे, कहाँबाट उहाँले अर्ब नाफा गर्नुभयाे, साँवा ब्याज जितेर साँच्चै ४ अर्ब नाफा भएकाे हाे भने माननीय मन्त्रीज्यूलाई माला लगाएर अभिनन्दन गरे हुन्छ, तर डाटाले त्यस्ताे देखाउँदैन, गलत तथ्यांक भ्रममा नपाराैं ।'
