काठमाडाैं । गृह मन्त्रालयले विशिष्ट व्यक्तिहरूको सुरक्षामा खटिएका ३ सय १६ जना सुरक्षाकर्मी फिर्ता गरेको छ ।
आइतबार बसेकाे प्रतिनिधि सभा बैठकमा विनियोजन विधेयक, २०८० का विभिन्न शीर्षकअन्तर्गत गृह मन्त्रालयबारे सांसद्हरुले उठाएका प्रश्नको जवाफ दिँदै उपप्रधान तथा गृहमन्त्री नारायणकाजी श्रेष्ठले बहालवाला तथा पूर्वविशिष्ट पदाधिकारीको सुरक्षामा खटिएका ३१६ जना सुरक्षाकर्मी फिर्ता गरेको जानकारी दिनुभयाे ।
यस कार्यमा पूर्व गृहमन्त्री (रवि लामिछाने) ले पनि सकारात्मक भूमिका खेलेको भन्दै प्रशंसा समेत गर्नुभयाे । विशिष्ट व्यक्तिहरुको व्यवस्थापन कार्यविधि २०७७ विपरीत बहालवाला तथा पूर्व विशिष्ट पदाधिकारीको सुरक्षामा खटिएका नेपाल प्रहरीका १९० जना र सशस्त्र प्रहरीका १२६ जनासहित ३१६ सुरक्षाकर्मी फिर्ता भइसकेको मन्त्री श्रेष्ठले बताउनुभयाे ।
राष्ट्रिय अनुसन्धान विभागलाई गृह मन्त्रालय मातहत ल्याउने सुझाव प्राप्त भएकाे भन्दै उहाँले यसबारे छलफल भइरहेकाे बताउनुभयाे ।
