काठमाडाैं । सञ्चार तथा सूचना प्रविधिमन्त्री रेखा शर्माले आम सञ्चारसम्बन्धी विधेयक छिटो भन्दा छिटो सदनमा पेस गर्ने बताउनुभएकाे छ ।
आइतबार बसेकाे प्रतिनिधि सभा बैठकमा सञ्चार मन्त्रालयका लागि विनियाेजित बजेटमाथि सांसद्ले उठाएका प्रश्नकाे जवाफ दिँदै मन्त्री शर्माले आम सञ्चार सम्बन्धी विधेयकका विषयमा विज्ञहरुसँग छलफल गरिसकिएकाे बताउनुभयाे ।
उहाँले भन्नुभयाे - 'आम सञ्चार सम्बन्धी विधेयकका विषयमा हामीले यस क्षेत्रका विज्ञहरुलाई समेटेर मन्त्रालयमा कार्यदलै बनाएर यी सम्बन्धी विधेयकहरुको सन्दर्भमा सुझाव प्राप्त गरेका छौं र मन्त्रालय त्यसमा वर्कआउट गर्दैछ, हामी छिटो भन्दा छिटो संसद्मा ल्याउने प्रक्रियामा छौं, मन्त्रालयकाे रुटिङमै यी सबै विधेयक राखेका छाैं, हामी सबैलाई थाहा छ यो सञ्चार र सूचना प्रविधिसँग ऐन, कानुनहरु असाध्यै पुराना छन्, यो क्षेत्रमा व्यापक रुपमा परिवर्तन भएको छ, नयाँ ऐन-कानुन जरुरी छ, हामी यसलाई छिटो भन्दा छिटो प्रक्रिया अघि बढाउनेछौं ।'
मन्त्री शर्माले साइबर सुरक्षासँग सम्बन्धित विषयहरू एकीकृत गरी साइबर सुरक्षा नीति तर्जुमाको प्रकियामा रहेको बताउनुभयाे । अहिले २४ घण्टा सञ्चालन भईरहेको साइबर सुरक्षा सञ्चालन केन्द्रलाई प्रभावकारी बनाउँदै साइबर सुरक्षा रेस्पोन्स टिम गठन गरी साइबर जोखिमको पूर्वानुमान र जोखिम न्यूनीकरणलाई थप प्रभावकारी बनाइने समेत उहाँले बताउनुभयो ।
मन्त्री शर्माले विद्युतीय तथ्यांकहरूको सुरक्षा, भण्डारण र उपयोगलाई व्यवस्थित बनाउन विद्युतीय तथ्यांक सुरक्षा नीति तर्जुमा गरिने जानकारी दिनुभयो । सूचना तथा सञ्चारको पहुँच वृद्धि गर्ने उद्देश्यले थालिको ब्रोडव्याण्ड इन्टरनेट सेवा सबै स्थानीय तहका केन्द्रमा पुगेको उहाँले बताउनुभयो । सबै वडा तहमा गुणस्तरीय इन्टरनेट सेवा पुर्याउने लक्ष्य लिइएको उहाँले बताउनुभयाे ।
उहाँले दुरसञ्चार सम्बन्धी फोरजी सेवा देशभर विस्तार भएकाे र फाइभजी सेवा पनि सुरु भएकाे बताउनुभयाे । विज्ञापन नियमावली समसामयिक संशाेधनकाे क्रममा रहेकाे मन्त्री शर्माले बताउनुभयाे ।
