काठमाडौं । नेपाली कांग्रेसका सांसद् दीपक गिरीले चट्याङबाट ज्यान गुमाएका परिवारलाई १० लाख क्षतिपूर्ति दिन सरकारसँग माग गर्नुभएकाे छ ।
साेमबार बसेकाे प्रतिनिधि सभा बैठककाे आकस्मिक समयमा बाेल्दै सांसद् गिरीले अहिले सरकारले चट्याङबाट ज्यान गुमाएकाका परिवारलाई २ लाख क्षतिपूर्ति दिने गरेकाे भन्दै त्यसलाई बढाएर १० लाख पुर्याउन माग गर्नुभयाे । उहाँले भन्नुभयाे - 'सरकारले नाम मात्रकाे २ लाख सिडियाे कार्यालय मार्फत मृत्युवरण गरेकाका परिवारलाई दिने गरेकाे छ, म आग्रह गर्छु कम्तिमा १० लाख दिइयाेस् ।'
२ दिनअघि मात्रै चट्याङबाट दाङमा दुई युवा किसान रामनारायण चौधरी र समीर केसीकाे ज्यान गएकाे र रुपा राना घाइते भएका सांसद् गिरीले बताउनुभयाे । विदेश नगएर स्वदेशमै बसेर केही गर्छु भन्ने किसानहरुले ज्यान गुमाउनु दु:खद भएकाे उहाँले बताउनुभयाे ।
त्यस्तै घटना बाग्लुङमा पनि भएकाे र दुई नाबालक दिनेश र सुनिता विकको ज्यान गएको भन्दै सांसद् गिरीले यस्ता घटनामा गम्भीर हुन सरकारकाे ध्यानाकर्षण गराउनुभयाे । गत वर्ष चट्याङबाट ५५ जनाकाे ज्यान गएकाे र १ सय ४४ जना घाइते भएकाे तथ्यांक रहेकाे भन्दै उहाँले प्रश्न गर्नुभयाे - 'खै उनीहरुका लागि सरकारले के गर्याे ?'
सवारी दुर्घटनाकाे दर बढेकाे भन्दै सांसद् गिरीले सडकहरु सही रुपमा निर्माण गर्न र सवारी साधनहरु नियममा चले-नचलेकाे हेर्न सरकारकाे ध्यानाकर्षण गराउनुभयाे ।
