काठमाडाैं । परराष्ट्रमन्त्री एनपी साउदले अखण्ड भारतकाे नक्सामा नेपाली भूमि समेटिएकोबारे भारतीय पक्षसँग कुरा गरी प्रतिवेदन पठाउन नेपाली राजदूतावासलाई निर्देशन दिएको बताउनुभएकाे छ ।
सोमबार बसेकाे प्रतिनिधि सभा बैठकमा परराष्ट्र मन्त्रालयकाे बजेटमाथि सांसद् उठाएका प्रश्नकाे जवाफ दिँदै मन्त्री साउदले भारतकाे संसद् भवनमा राखिएकाे नेपाली भूमि समेटिएकाे नक्साबारे कुरा गरेर प्रतिवेदन नेपाली राजदूतावासलाई निर्देशन दिइसकेकाे बताउनुभयाे ।
यसबारे आफूले भारतीय विदेशमन्त्रीसँग कुरा गरेकाे तर उहाँले अशोककालीन चित्र भएको र यो राजनीतिक नभएको बताएको पनि उहाँले जानकारी दिनुभयो
नेपालको एक इञ्च भूमि पनि अतिक्रमण हुन नदिने गरी सीमा समस्या आपसी समझदारीमा समाधान गर्ने सहमति प्रधानमन्त्री पुष्पकमल दाहाल प्रचण्डकाे भारत भ्रमणका क्रममा भएको दाबी पनि मन्त्री साउदले गर्नुभयाे । देशको सार्वभौमसत्ता, राष्ट्रिय अखण्डता, स्वतन्त्रता र अन्तर्राष्ट्रिय सीमामा कुनै आँच आउन नदिन सरकार प्रतिबद्ध रहेकाे उहाँले बताउनुभयाे ।
मन्त्री साउदले दक्षिण एसियाली क्षेत्रीय सहयोग संगठन (सार्क) लाई गतिशील बनाउन सरकार लागिपरेको दाबी पनि गर्नुभयाे । उहाँले गैरआवासीय नेपालीको लगानीका लागि परराष्ट्रले सहजीकरण गर्दै आएको, राहदानी सेवालाई सहज बनाएको बताउनुभयो ।
भारत भ्रमणमा निजी क्षेत्रका अधिकारीहरू निजी खर्चमा गएको दाबी समेत मन्त्री साउदले गर्नुभयाे ।
