काठमाडौं । प्रतिनिधि सभा सदस्य रामहरि खतिवडाले कृषि मन्त्रीहरू नियुक्त भएर आउँदा मल बिउ समयमा नै ल्याउनु पर्छ भन्ने तर काम भने नगर्ने परम्परा जस्तै बनेको बताउनुभएको छ ।
मंगलबार प्रतिनिधि सभा बैठकमा बोल्दै खतिवडाले कुन महिनामा कुन मल बिउ चाहिन्छ भन्ने जानकारी नै कृषि मन्त्रीहरूलाई नभएको बताउनुभयो । उहाँले यसको जानकारीको पहल गर्न अनुरोध गर्नुभयो ।
अहिले लम्पि स्किन रोगबाट हजारौँ पशुपन्छी मरेका भन्दै उहाँले चिन्ता व्यक्त गर्नुभएको छ । ‘लम्पि स्किन रोगबाट हजारौँ पशु पन्छी मरे, अब बाँकी भएका सबै पशुपन्छी मरेपछि औषधि उपचार गर्ने हो कि, अहिल्यै गर्ने हो ? यो पनि अनुरोध गर्न चाहेँ’, उहाँले भन्नुभयो ।
उहाँले विषादीको चेक गर्ने व्यवस्था कहिले गरिन्छ ? भन्दै कृषि मन्त्रीलाई प्रश्न गर्नुभयो । ‘मन्त्री आफू हुँदै कि बाहिर गएपछि ?’, उहाँले प्रश्न गर्नुभयो ।
खतिवडाले कृषिमा अनुदान दिने परिपाटी पनि गलत भएको बताउनुभयो । ‘कृषिमा अनुदान दिने पार्टीका कार्यकर्तालाई कि, कृषकलाई ? यसको पनि सही जवाफ होस्’, उहाँले भन्नुभयो ।
