काठमाडाैं । नेकपा एमालेका सचिव एवं सांसद् याेगेश भट्टराईले पुष्पकमल दाहाल प्रचण्ड नेतृत्वकाे सरकारले बतासे कुरा उठाएर मुलुककाे ध्यान अन्यत्र माेड्न खाेजेकाे बताउनुभएकाे छ ।
मंगलबार संघीय संसद् भवन परिसरमा सञ्चारकर्मीसँग कुरा गर्दै सांसद् भट्टराईले सरकारले बतासे कुरा गर्दै मुलुककाे ध्यान अन्यत्र माेडेर आफूहरुले गरेका ठूला-ठूला काण्ड ओझेलमा पार्न खाेजेकाे बताउनुभयाे ।
केही विषयमा एमालेलाई नियोजित रुपमा मुछ्ने काम भएको भन्दै उहाँले एमालेका कुनै पनि नेताले अनियमितता गरेकाे पाइए एमाले । 'एमालेकाे कुनै नेताले गडबड गरेकाे छ भन्ने आए एमालेले आफ्नाे पार्टीमा राख्छ त ? त्याे त कानुनी र तथ्यले पुष्टि हुनुपर्याे, बाहिर हावाकाे भरमा कुरा गरेर भएन, यस्ता फण्डा कति आइराखेका छन् ? जलहरीमा एमालेलाई मुछिएकाे थिएन ? अख्तियारले जाेख्दा जलहरीमा सुन कति रहेछ ? बाहिर बतासे कुरा उठाएर मुलुककाे ध्यान अन्यत्र माेड्ने, अनि आफूले गरेका ठूला-ठूला काण्डहरु ओझेल पार्ने काम भएकाे छ' - सांसद् भट्टराईले भन्नुभयाे ।
लडाकु काण्डका अरबाैं खरबाैं बेरुजु रहेकाे कुरा महालेखा परीक्षक र अख्तियारले बताइसकेकाे भन्दै उहाँले त्यसमा पनि छानबिन हुनुपर्ने बताउनुभयाे । सांसद् भट्टराईले भन्नुभयाे - 'त्यसमा पनि छानबिन हुनुपर्याे नि, त्यसमा त प्रधानमन्त्रीजी पनि परिहाल्नुहुन्छ, माओवादीका नेताहरु पर्नुहुन्छ ।'
सरकारी तवरबाट निर्माण हुने काममा सरकार प्रमुख र शिलान्याश गर्नेको नाम राख्नु स्वभाविक भएकाे भन्दै सांसद् भट्टराईले जलहरी बनाउँदा पनि ताम्रपत्रमा पूर्व राष्ट्रपति र प्रधानमन्त्रीको नाम राख्नु स्वभाविक भएकाे प्रष्ट पार्नुभयाे ।
संसद् भवन पनि राजा वीरेन्द् शाहले उद्घाटन गरेकाे भनेर ताम्रपत्र रहेकाे भन्दै उहाँले त्याे भवन भत्काउन जानुहुन्छ कि भन्दैप्रश्न गर्नुभयाे । उहाँले भन्नुभयाे - 'प्रचण्डजीले कतिवटा पुल, भवन उद्घाटन गर्नुभएकाे छ, प्रचण्डजीले उद्घाटन गरेकाे ताम्रपत्र त्यहाँ छ, माओवादी साथीहरु त्याे भत्काउन जानुहुन्छ कि ? शेरबहादुर देउवाले उद्घाटन गरेकाे भनेर कति पुल, सार्वजनिक भवन हाेलान्, कांग्रेसका साथीहरु त्याे भत्काउन जानुहुन्छ कि ?'
पशुपतिनाथ मन्दिरको जलहरी प्रकरणमा संसदीय छानविन समिति बनाए राष्ट्रपतिलाई छानविन समितिको संयोजक बनाउनुपर्ने पनि सांसद् भट्टराईले बताउनुभयाे । पूर्व राष्ट्रपति विद्यादेवी भण्डारी र पूर्व प्रधानमन्त्री केपी ओलीलाई मुछ्ने काम भएकाले वर्तमान राष्ट्रपति रामचन्द्र पाैडेल संयोजक, प्रधानमन्त्री पुष्पकमल दाहाल प्रचण्ड र संस्कृति पर्यटन तथा नागरिक उड्डयन मन्त्री सुदन किराँतीलाई सदस्य बनाएर तीन सदस्यीय छानबिन समिति बनाउनुपर्ने उहाँले बताउनुभयाे ।
