काठमाडौं । प्रतिनिधि सभा सदस्य पदम गिरीले सरकारको चरम लापरबाही र गैर जिम्मेवारपनको कारण प्रतिनिधि सभाको बैठक सुरु हुने बित्तिकै स्थगित गर्नुपर्ने अवस्था आएको बताउनुभएको छ ।
आइतबार प्रतिनिधि सभा बैठक सुरु हुने बित्तिकै राष्ट्रिय सभामा उत्पत्ति भएको मुलुकी संहिता सम्बन्धी केही नेपाल ऐनलाई संशोधन गर्ने विधेयक २०८० सम्बन्धमा राष्ट्रिय सभाबाट प्राप्त सन्देश सहितको विधेयक प्रतिनिधि सभाका सचिवले टेबल गर्नुभएको थियो । त्यस पछि कार्यसूचीको २ देखि ६ सम्मको कार्यक्रम अर्को बैठकको लागि सारेको जानकारी सभामुखले दिनुभएको थियो । त्यसपछि उहाँले १५ मिनेटको लागि बैठक स्थगित गर्नुभएको थियो ।
प्रतिनिधि सभाको आजको बैठकमा आर्थिक विधेयक माथि छलफल गर्ने कार्यसूची रहेको थियो । तर बैठक ती कार्यसूचीमा नै प्रवेश गरेन ।
स्थगित भएको पहिलो बैठक पुनः सुरु भएपछि बैठकमा गिरीले नयाँ जनप्रतिनिधि आएदेखि संसद्ले एउटा ऐन पनि बनाउन नसकेको बताउनुभयो । ‘यो भन्दा लज्जाजनक स्थिति के हुन सक्छ ?’ गिरीले प्रश्न गर्नुभयो ।
संसदमा ऐन निर्माणको प्रक्रियामा समेत संसद्लाई गुमराहमा राख्ने काम भएको उहाँले बताउनुभयो । संसदमा छलफल नै नगरी हतार हतार विधेयक पास गर्ने गरी सरकारले पेस गरेको उहाँको भनाइ छ ।
मिटरब्याजी प्रकरणको विषय निक्कै गम्भीर विषय भएको उहाँले बताउनुभयो । सो कार्यमा उच्च सरकारी अधिकारी, राजनीतिक दलका उच्च नेताहरू र उच्च सुरक्षा अधिकारी समेत संलग्न भएकोले त्यसलाई नियन्त्रण गर्ने व्यवस्थित ऐन बन्नु पर्नेमा उहाँले जोड दिनुभयो ।
