काठमाडौं । कानुन, न्याय तथा संसदीय मामिला मन्त्री धनराज गुरुङले सरकार सधैँ पीडितको पक्षमा हुने बताउनुभएको छ ।
आइतबार प्रतिनिधि सभाको बैठकमा मुलुकी संहितासम्बन्धी केही नेपाल ऐनलाई संशोधन गर्ने विधेयक २०८० माथिको सैद्धान्तिक छलफलमा भाग लिने क्रममा सांसदहरूले उठाउनुभएको प्रश्नको जवाफ दिने क्रममा गुरुङले सरकार पीडितलाई न्याय दिने र पीडकलाई कारबाही गर्ने कुरामा प्रतिबद्ध रहेको बताउनुभयो ।
गुरुङले सरकार सधैँ न्यायको पक्षमा उभिने बताउनुभयो । सरकारले कसैलाई पनि शक्ति र पहुँचको आधारमा नछाड्ने उहाँले प्रष्ट पार्नुभयो । कसैको अनुहार हेरेर वा पार्टी हेरेर छाड्ने र समात्ने नहुने उहाँले बताउनुभयो । ‘माथिलाई छोड्ने, तललाई समात्ने हुँदै होइन’, उहाँले भन्नुभयो ।
गुरुङले कालो धन र अवैध सम्पत्तिलाई नियन्त्रण गर्ने कुरामा सरकार प्रतिबद्ध रहेको बताउनुभयो ।
