काठमाडौँ । प्रतिनिधि सभा सदस्य प्रदीप पौडेलले पीडित नेपाली जनतालाई लोकतन्त्र र गणतन्त्रले नछोएको बताउनुभएको छ ।
आइतबार प्रतिनिधि सभा बैठकमा मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८० माथिको सैद्धान्तिक छलफलमा भाग लिँदै पौडेलले मिटरब्याज पीडितहरू लगातार पीडित हुँदा पनि प्रजातन्त्र र लोकतन्त्रले उनीहरूको पीडालाई सम्बोधन गर्न नसकेको बताउनुभयो । ‘नेपालमा लोकतन्त्र आयो, गणतन्त्र आयो, तर मिटरब्याज पीडितलाई त लोकतन्त्र, गणतन्त्र केही पनि आएको रहेनछ त’, उहाँले भन्नुभयो ।
मिटरब्याजीले अदालतलाई समेत प्रयोग गरेर पीडित माथि थप शोषण र अन्याय गरेका उहाँले बताउनुभयो । चेकमा हस्ताक्षर गर्न लगाएर चेक बाउन्स गराएर उनीहरूलाई मिटरब्याजीले उनीहरूलाई थुनाएर मुद्दा दर्ता गराई अदालतले साहूहरूकै पक्षमा फैसला गराइदिएको उहाँले सुनाउनुभयो ।
त्यस विषयमा न त सरकारको न संसद्को नै ध्यान पुगेको पौडेलले बताउनुभयो । ‘यत्रो समयसम्म हामीले यो हेरेर बसिरहनुको कारण के हो ? वास्तवमा राज्यले किन यसलाई देखेन ? हामीले राज्यको त्यहाँ किन उपस्थिति गराउन सकेनौँ ? त्यत्रो गम्भीर अन्यायमा पर्दा, त्यत्रो ठुलो समस्यामा पर्दा पनि हाम्रो राज्य त्यहाँ उपस्थिति हुन किन सकेन ? संसद्ले त्यसलाई किन ख्याल गरेन ?’, उहाँले प्रश्न गर्नुभयो ।
अहिले सहकारी सञ्चालकले समेत बचतकर्तालाई ठगेको समाचारहरू बाहिर आएको प्रति पौडेलले ध्यानाकर्षण गराउनुभयो । यस विषमा गम्भीर हुनुपर्ने उहाँले औँल्याउनुभयो ।
वित्तीय अनुशासन कायम गर्न नसक्ने देश उँभो लाग्न नसक्ने उहाँले बताउनुभयो । वित्तीय अनुशासन उलंघन गर्ने कुर्न पनि व्यक्तिलाई सख्त कारबाही हुनु पर्ने उहाँले बताउनुभयो ।
बलियो वित्तीय कानुन नबन्दा अहिलेको समस्या आएको उहाँले बताउनुभयो । संसद् अधिवेशन हुने तर कानुन नबन्ने विडम्बनापूर्ण स्थिति रहेको उहाँको भनाइ छ । ‘एउटै विधेयक पेश नगरी संसद्को अधिवेशन सकिने कुरा स्वाभाविक हुन सक्दैन’, पौडेलले भन्नुभयो ।
