काठमाडौं । आइतबार अवरुद्ध भएको वाग्मती प्रदेश सभाको बैठक आज पनि बोलाइएको छ ।
प्रदेश सभा बैठक बिहान ११ बजे बोलाइएको छ । सत्ता गठबन्धनले एकलौटी रूपमा बजेट वितरण गरेको भन्दै प्रमुख प्रतिपक्षी दल नेकपा एमाले लगायतका प्रतिपक्षी दलले बजेट माथिको छलफल लगातार अवरुद्ध गर्दै आएका छन् ।
प्रदेश सरकारले असार १ गते ल्याएको बजेटमाथि छलफलका लागि असार १३ गते बैठक आह्वान गरिएको थियो । विपक्षी दलले गठबन्धनले व्यक्तिगत सम्पत्ति जस्तै गरी बजेट बाँडफाँड गरेको भन्दै छलफल अवरुद्ध गर्दै आएका छन् ।
आइतबार पनि दिउँसो दुई बजेको लागि बैठक बोलाइएको थियो । चार बजे मात्रै सुरु भएको बैठक प्रतिपक्षले अवरुद्ध गरेपछि आज बिहान ११ बजेको लागि बोलाइएको हो ।
आइतबार एमालेले पत्रकार सम्मेलन गरी बजेटमा ११ वटा विषय समेट्नु पर्ने माग राखेको छ । ती विषय नसमेटेसम्म सभा चल्न नदिने बताएको छ । तसर्थ आज पनि बैठक चल्ने सम्भावना छैन ।
