काठमाडाैं । राष्ट्रिय सभा उपाध्यक्ष उर्मिला अर्यालले दलितमाथि विभेद गर्नेलाई कारबाहीको प्रक्रिया अघि बढाई सदनमा जानकारी गराउन सरकारलाई निर्देशन दिनुभएको छ ।
सोमबार बसेकाे राष्ट्रिय सभा बैठकको सुरुमै दलितमाथि हुने विभेद बढ्दै गएको भन्दै सांसद्हरुल् उठेर विरोध जनाएपछि राष्ट्रिय सभा उपाध्यक्ष अर्यालले दलितमाथि विभेद गर्नेलाई छानबिन गरी कारबाही प्रक्रिया अघि बढाउन सरकारलाई निर्देशन दिनुभएको हो ।
त्यसअघि बैठकमा राष्ट्रिय सभा सदस्य राधेश्याम पासवानले सिराहाको भगवानपुरमा सामूहिक भोजमा दलितमाथि भएको विभेदका विषयमा पटक पटक कुरा राख्दा पनि दोषीलाई कारवाही हुन नसकेको भन्दै आपत्ति जनाउनुभयो । दाङको तुलसीपुरमा दलित विद्यार्थीको जात थाहा पाएपछि घरबेटीले घर निकाला गरेको, सप्तरीमा अन्तरजातिय विवाह गर्दा मुद्दा चलाएको लगायतका घटनाले दलितमाथि अपमान भएको भन्दै उहाँले उक्त घटनामा पनि दोषीलाई कारबाही हुन नसकेको गुनासो गर्नुभयो ।
पासवानले दोषीलाई कारबाही नगर्ने र कानुनलाई पालना नगराउने प्रहरी र सीडीओलाई नै कारवाही गर्नुपर्ने माग गर्नुभयो । यस विषयमा सांसदहरुले उठेर विरोध जनाएपछि राष्ट्रियसभा उपाध्यक्ष अर्यालले जवाफ दिन सरकारलाई रुलिङ समेत गर्नुभयो ।
आजकाे बैठकको अध्यक्षता उपाध्यक्ष अर्यालले गर्नुभएकाे थियाे ।
