काठमाडौं । नेकपा एमालेकी सांसद् इन्दिरादेवी गौतमले प्रधानमन्त्री पुष्पकमल दाहाल प्रचण्डले राष्ट्रिय स्वाभिमानमा आँच आउने अभिव्यक्ति दिएको भन्दै आपत्ति जनाउनुभएकाे छ ।
मंगलबार बसेकाे राष्ट्रिय सभा बैठककाे शून्य समयमा बाेल्दै सांसद् गाैतमले साेमबार भएकाे एक कार्यक्रममा प्रधानमन्त्री प्रचण्डले दिएकाे अभिव्यक्ति स्वतन्त्र र सार्वभौम सम्पन्न नेपालीका लागि गम्भीर आपत्तिजनक रहेको बताउनुभयाे ।
साेमबार आयाेजित रोड्स टु द भ्याली (द लिगेसी अफ सरदार प्रीतम सिंह इन नेपाल) को विमोचन कार्यक्रममा प्रधानमन्त्री प्रचण्डले प्रीतम सिंह आफूलाई प्रधानमन्त्री बनाउन धेरैपटक दिल्ली गएको अभिव्यक्ति दिनुभएकाे थियाे ।
प्रधानमन्त्रीकाे साे अभिव्यक्ति आपत्तिजनक रहेकाे भन्दै सांसद् गाैतमले प्रधानमन्त्रीको कुर्सीमा बसेर राष्ट्रिय स्वाभिमानमा आँच पुर्याउने अभिव्यक्ति दिन छुट नभएकाे बताउनुभयाे । 'हिजो एक सार्वजनिक कार्यक्रममा प्रधानमन्त्रीले दिनुभएको अभिव्यक्ति स्वतन्त्र, सार्वभौम सम्पन्न स्वाभिमानी नेपालीका लागि गम्भीर आपत्तिजनक छ, मलाई प्रधानमन्त्री बनाउन धेरै पटक दिल्ली जानुभएको भनेर कोही व्यक्ति विशेषलाई उहाँले इंकित गर्दै भन्नुभएको छ, याे मुलुकको स्वतन्त्रता र सार्वभौमिकतालाई जोगाउन धेरै देशभक्त नेपालीले रगत बगाएका छन्, जीवनकाे आहुती दिएका छन्, प्रधानमन्त्रीको कुर्सीमा बसेर यस किसिमका राष्ट्रिय स्वाभिमानमा आँच पुर्याउने अभिव्यक्ति दिन उहाँलाई कदापि छुट दिन सकिँदैन'- उहाँले भन्नुभयाे ।
यस विषयमा सदनमा आएर स्पष्ट पार्न र आफ्नाे अभिव्यक्ति फिर्ता लिन समेत सांसद् गाैतमले प्रधानमन्त्री प्रचण्डलाई आग्रह गर्नुभयाे । उहाँले भन्नुभयाे - 'यस विषयमा प्रधानमन्त्रीले सदन समक्ष आएर स्पष्ट पार्न र आफ्ना भनाइ फिर्ता लिन अनुरोध गर्दछु ।'
