काठमाडाैं । प्रमुख प्रतिपक्षी नेकपा एमालेका सांसद् गाेकुल बाँस्काेटाले राष्ट्रिय आत्मसमर्पणवाद स्वीकार्य नहुने बताउनुभएकाे छ ।
साेमबार बसेकाे प्रतिनिधि सभा बैठककाे सुरुमै समय लिएर बाेल्दै सांसद् बाँस्काेटाले प्रधानमन्त्री पुष्पकमल दाहाल प्रचण्डकाे अभिव्यक्ति आपत्तिजनक रहेकाे बताउनुभयाे ।
सार्वभौमसत्तामाथि आक्रमण हुँदा एमाले चुप लागेर नबस्ने चेतावनी दिँदै उहाँले सत्ता स्वार्थका निम्ति देशको सार्वभौमसत्ता साट्न नसकिने बताउनुभयाे । 'यो संसद लगातार अवरुद्ध हुँदै आएको छ, त्यसको कारण प्रतिपक्षलाई बनाईयो, सत्तापक्षले हामीमाथि हिलो छ्याप्ने कोशिस गर्यो, तर आफ्नो स्पष्टिकरण दिएन, हामीले प्रश्न उठाएका थियौं, हाम्रो देशको प्रधानमन्त्री देशभक्त हुनुहुन्. क्रान्तिकारी हुुनुहुन्छ र, स्मरण गर्दछु कि उहाँले परिवर्तनका लागि भनेर ४० सुत्रीय माग राखेर आन्दोलन गर्दा प्रभुत्वाद, उपविवेशवाद, विस्तारवादका विरुद्ध ९ वटा कुरा राख्नु भएको थियो, हेक्का होला तर आज त्यही ट्रक चढेर उहाँ कहाँ पुग्दै हुनुहुन्छ ? हाम्रो प्रश्न यो थियो, यसबारे उहाँले संसदलाई स्पष्ट पार्नुभएन, उहाँले कठपुतली भनिरहनुभयो'- बाँस्काेटाले भन्नुभयाे ।
प्रधानमन्त्रीले एकपछि अर्काे राष्ट्रहित विपरीतकाे अभिव्यक्ति दिएकाे उहाँले बताउनुभयाे । सांसद् बाँस्काेटाले भन्नुभयाे - 'आफूलाई कम्फरटेवल भन्नुभयो, हामीले त्यो पनि सह्यौं, चीनको सल्लाहमा म भारत गए भन्नुभयो त्यो पनि हामीले हाम्रो देशको प्रधानमन्त्री जाने हो, नेपालको हितका कुरा गर्नुहोला भन्यौं, तर अहिले आएर एउटा किताब विमोचनको सन्दर्भमा उहाँले आफूलाई यो संसद्ले होइन नेपाली जनताले होइन्, अरु कसैको साथ र सहयोगमा म प्रधानमन्त्री बने भन्ने खालको कुरा गर्ने कुरामा प्रमुख प्रतिपक्ष दलले प्रश्न उठायो ।'
प्रधानमन्त्री प्रचण्डले संसद्लाई, प्रतिपक्षलाई मात्र नभएर सम्पूर्ण नेपाली जनतालाई चित्तबुझ्दाे जवाफ नदिए राजीनामा दिनुपर्ने उहाँले बताउनुभयाे । 'उहाँको भनाई स्पष्ट रुपमा हामीलाई, यो सार्वभौम संसदलाई, यसमार्फत् दुई करोड ९१ लाख नेपाली जनतालाई आश्वस्त पार्ने खालको आउँछ कि आउँदैन ? हाम्रो पर्खाइ त्यो हो, प्रधानमन्त्रीज्यूले संसदलाई स्पष्ट पार्नुपर्दछ, उहाँले सक्नुहुन्छ भने देशको लागि उभिने आँट गर्नुस्, पद छोडिदिनुस्, सत्ता स्वार्थको निम्ति देशको सार्वभौमसत्ता साटिँदैन'- सांसद् बाँस्काेटाले भन्नुभयाे ।
सदनलाई आश्वस्त पार्न नसके प्रधानमन्त्रीले तत्काल राजीनामा दिनुपर्ने उहाँले बताउनुभयाे । 'उहाँले राजीनामा दिनुपर्छ, उहाँले एक्स्क्युज गर्नुपर्छ हाम्रो भनाई त्यही हो, उहाँको भनाई स्पष्ट रुपमा हामीलाई, सार्वभौम संसद्लाई यसमार्फत् २ करोड ९१ लाख जनतालाई आश्वास्त पार्ने खालको आउँक छि आउँदैन ? हाम्रो पर्खाइ त्यो हो, त्यसकारणले उहाँले आफूले एउटा देशको प्रधानमन्त्रीको रुपमा उभिएर के कुरा लिएर हिँडनु भएको छ ? मोरीयार्टीलाई बिर्साउन खोज्नुभएको हो, लेण्डुपलाई बिर्साउन खोज्नु भएको हो ? हामीलाई विश्वास लाग्दैन त्यो, तर वातावरणले, व्यवहारले, अभ्यासहरुले, कुराहरुले, लघुताभासले, आत्मसमर्पणवादले, राष्ट्रिय आत्मसमर्पणवाद स्विकार्य छैन, त्यसकारण प्रधानमन्त्रीज्यूले संसदलाई स्पष्ट पार्नुपर्दछ, उहाँले सक्नुहुन्छ भने देशका लागि उभिने आँट गर्नुस्, पद छाडिदिनुस्, सत्ता स्वार्थको निम्ति देशको सार्वभौमिकता साटिँदैन'- सांसद् बास्काेटाले भन्नुयभयाे ।
देशकाे प्रधानमन्त्री बलियाे हुनुपर्ने एमालेकाे स्पष्ट धारणा रहेकाे उहाँले बतानुभयाे । 'हाम्रो देशको प्रधानमन्त्रीलाई हामी त्यति कमजोर देख्न चाहन्नौं, आन्तरिक कुरा जेसुकै होस, एमाले रहोस्-नरहोस्, माओवादी रहोस्-नरहोस्, कांग्रेस रहोस नरहोस्, तर यो देश र यो देशका जनताको सावैभौमसत्ता रहनुपर्छ भन्ने हाम्रो मत हो, त्यका निम्ति हामीले प्रश्न उठाएका थियौं, उहाँले कालापानी, लिपुलेकको कुरा पनि उठाउनुभएन, एउटा पुरानो गीत छ सेतो र चोली, कालो र चोली कुन चोली सिएको ? यो गीत मैले गाएको होइन, सम्झाई दिएको, म सोच्छु-सम्माननीय प्रधानमन्त्रीज्यू र तपाईलाई भन्नुपर्ने - तपाइँले चन्द्रसूर्य झण्डा उचालने हो कि भन्नु पर्यो यो संसद्मा ।'
दुई करोड ९१ लाख जनतालाई हाम्रो प्रधानमन्त्री हामीले बनाएको हो भन्ने विश्वास दिलाउन सांसद् बाँस्काेटाले प्रधामन्त्रीलाई सुझाव दिनुभयाे । 'त्यसैले यो असाध्यै जनता दुखित हुने कुरा र हाम्रो सार्वभौमसत्तामाथि निरन्तर हमला हुने कुरा र त्यसमा प्रधानमन्त्रीको मौनता हाम्रो लागि स्विकार्य भएन, देशको लागि स्विकार्य भएन, चन्द्रसूर्य झण्डाका लागि स्वीकार्य भएन, चार तारे, लालतारेको निम्ति जेसुकै होस् मैले अघिनै उल्लेख गरेँ ।'
सांसद् बाँस्काेटाले तिरंगा झण्डा उठाउने कि चन्द्र सूर्यको झण्डा उठाउने भन्दै प्रधानमन्त्री प्रचण्डलाई प्रश्न गर्नुभयाे । उहाँले भन्नुभयाे - 'तपाईंले तिरंगा झण्डा उठाउने हो कि चन्द्र सूर्य झण्डा उठाउने हो ?'
मिटरब्याजी सम्बन्धी विधेयक एमालेले प्रतिपक्षले पास गर्न दिएन भनेर सत्तापक्षले भ्रम फैलाएकाे भन्दै उहाँले आपत्ति जनाउनुभयाे । 'सत्तापक्षले मिटरब्याजको विषयमा भ्रम छर्न खोज्यो, प्रधानमन्त्रीज्यू तपाइँले संसद् चलेकाे ५७ दिनपछि त्यो अध्यादेश ल्याउनुपर्छ ? जबकि सदन चलिरहेको छ थाहा होला, पहिलो चोटी प्रधानमन्त्री भएको होइन तपाइँ, त्यसैले हामीले संशोधन समेत राखेनौं, कुनै अवरोध गरेनौं, अनि मिटरब्याजीको विपक्षमा एमाले रह्यो, प्रमुख प्रतिपक्ष रह्यो भनेर तपाइँकाे सचिवालयले वक्तव्य जारी गरेर हामीमाथि लाञ्छना लगाउनु मिल्छ ? कहाँनिर विरोध भयो ? यहाँ भन्नुपर्यो'- बाँस्काेटाले भन्नुभयाे ।
काेशीमा सभामुखलाई प्रयाेग गरेर सरकारले कु गरेकाे पनि उहाँले बताउनुभयाे । सांसद् बाँस्काेटाले भन्नुभयाे - 'गठबन्धनको बैठक राखेर कोशी प्रदेशको सन्दर्भमा समेत त्यहाँको सरकार कु गर्ने काम गर्यो, राजनीतिक कु गर्ने काम गर्यो, संविधान च्याँत्ने काम गर्यो, हिजो के भन्नु भएको थियो ? आज सम्झिनु पर्दैन ? आज थाहा हुँदैन ? एक माघले जाँडो जाँदैन, राजनीतिमा एकले अर्कालाई वाच गरिरहेको हुन्छ भन्ने कुरा स्मरण गराउन चाहन्छु ।'
